اسرائیل نے مصر کے راستے غزہ تک امداد کی ترسیل کی اجازت دے دی
قاہرہ(این این آئی)بڑھتے ہوئے بین الاقوامی دبا کے بعد اسرائیل نے مصر کے راستے غزہ کے لیے امداد کی اجازت دے دی۔غیرملکی خبررساں ادارے کے مطابق اسرائیلی حکومت نے کہا کہ مصر کے راستے غزہ کی پٹی میں آنے والی امداد کا راستہ نہیں روکا جائے گا۔اسرائیلی حکومت نے یہ اعلان امریکی صدر جوبائیڈن کے دورے اور اتحادی ممالک کی جانب سے غزہ کی پٹی میں محصور فلسطینیوں تک امداد کی ترسیل کی اجازت دینے کے لیے بڑھتے ہوئے دبا کے بعد کیا ہے۔اسرائیلی وزیراعظم بنجمن نیتن یاہو کے دفتر کی جانب سے جاری کردہ بیان میں کہا گیا کہ امریکی صدر جوبائیڈن کے مطالبے پرفیصلہ کیا گیا ہے کہ مصر کی طرف سے جنوبی غزہ کی پٹی میں خوراک ، پانی اور ادویات پر مشتمل انسانی امداد کی ترسیل نہیں روکی جائے گی۔بیان میں مزید کہا گیا ہے کہ اپنے یرغمال شہریوں کی رہائی تک اسرائیل اپنی سرزمین سے غزہ کی پٹی کو کسی انسانی امداد کی ترسیل کی اجازت نہیں دے گا۔یہ ابھی واضح نہیں ہے کہ غزہ تک امداد کب پہنچے گی کیونکہ غزہ کے ساتھ لگنے والی مصری سرحد کی گزرگاہ جسے رفحہ کراسنگ کہا جاتا ہے وہ، بقول مصری حکومت، اسرائیلی طیاروں کی بمباری کی وجہ سے تباہ ہوچکی ہے۔
