جوڈیشل کمپلیکس کیس ، عمران خان سمیت 172افراد کے موبائل سے متعلق رپورٹ طلب

اسلام آباد (این این آئی)اسلام آباد کی انسدادِ دہشت گردی کی عدالت نے بانی پی ٹی آئی اور سابق وزیرِ اعلیٰ پنجاب پرویز الٰہی سمیت 172 افراد کے خلاف جوڈیشل کمپلیکس توڑ پھوڑ کیس میں تفتیشی افسر سے ملزمان کے موبائل سے متعلق رپورٹ طلب کر لی۔کیس کی سماعت جج طاہر عباس سپرا نے کی جس کے دوران پی ٹی آئی کارکنان وکیل سردار مصروف کے ہمراہ پیش ہوئے۔جج طاہرعباس سپرا نے سوال کیا کہ پرویز الہی سے متعلق جیل کی طرف سےکوئی رپورٹ آئی ہے؟عدالتی عملے نے بتایا کہ جیل سے ابھی تک کوئی رپورٹ نہیں آئی ہے۔جج طاہرعباس سپرا نے کہا کہ اس مقدمے میں 172ملزمان ہیں، ٹرائل جلد ختم ہو جانا چاہیے، جو ملزمان پیش نہیں ہو رہے ان کا کیس الگ کر دیتے ہیں، کورٹ نمبر ون کا چارج ہوتا تو اس کیس کا ٹرائل 1ہفتے میں ختم کر دیتے، اگر ملزمان نے جرم کیا ہے تو انہیں سزا مل جائے، نہیں تو بری کر دیا جائے۔وکیل نے بتایا کہ ملزمان سے برآمد موبائل فونز کی سپر داری درخواست منظور ہونے کے باجود مہنگے موبائل فونز نہیں دیے گئے۔اے ٹی سی جج نے حکم دیا کہ آئندہ سماعت پر تفتیشی افسر اس بارے میں رپورٹ پیش کرے۔بعد ازاں کیس کی سماعت 17 مئی تک ملتوی کر دی۔

اپنا تبصرہ بھیجیں