میانمار چینی قونصلیٹ پردھماکا

ینگون (این این آئی)جنوب مشرقی ایشیا کے ملک میانمار میں جمعہ کو چینی قونصلیٹ میں دھماکا ہوا جس کے نتیجے میں عمارت کو جزوی نقصان پہنچا۔ دو منزلہ عمارت میں ہونے والے دھماکے میں کوئی ہلاک یا زخمی نہیں ہوا۔میڈیارپورٹس کے مطابق میانمار کی فوج نے بتایا کہ فارنزک لیب بھی کام کر رہی ہے پوچھ گچھ کی تیاری بھی کی جارہی ہے۔ کسی بھی شخص یا گروپ نے اس دھماکے کی ذمہ داری قبول نہیں کی ہے۔ دھماکا ملک کے دوسرے بڑے شہر منڈالے میں واقع چینی قونصل خانے میں ہوا۔میانمار میں کئی باغی گروپ کام کر رہے ہیں۔ فوج انہیں کچلنے کی کوشش میں مصروف رہی ہے۔ اقلیتی گروپوں پر مشتمل مسلح گروپوں نے میانمار کی فوج کو ناکوں چنے چبوائے ہیں۔میانمار میں قائم فوجی حکومت کو چین کی بھرپور حمایت حاصل ہے۔ فوج نے 2021 میں آنگ سانگ سوچی کی منتخب حکومت کو برطرف کرکے اقتدار پر قبضہ کرلیا تھا۔