پختہ سڑکوں کو دوبارہ توڑ کر بنانا کرپشن اور کمیشن کیلئے جوازبنانا ہے، نیشنل پارٹی

کوئٹہ (آن لائن) نیشنل پارٹی ضلع کوئٹہ کے بیان میں کوئٹہ شہر کے مختلف سڑکوں کو توڑ کر دوبارہ بنانے پر رد عمل کا اظہار کرتے ہوئے کہا کہ شہر کے تمام سڑکیں پختہ اور اچھے پوزیشن پر موجود ہیں ان کو توڑ کر دوبارہ بنانے کا ایک ہی جواز ہے کہ کرپشن و کمیشن کو بروئے کار لاکر مفادات حاصل کی جائے۔بیان میں کہاگیا کہ کوئٹہ شہر محدود علاقہ ہے لیکن اس میں ہرسال ایم پی اے کی جانب سے اور دیگر محکموں کی جانب سے ترقیاتی فنڈز سڑکوں کو توڑ کر دوبارہ تعمیر کیاجاتا ہے۔جو عوامی ترقیاتی فنڈز کا بے دریغ و غیر ضروری استعمال ہے۔بیان میں کہاگیا کہ دوسری طرف میڑو پولیٹن کو پرائیویٹ سیکٹر میں دینے کا فایدہ عوام کو نہیں مل رہا ہے۔صفائی کی صورت ناقص ہے اور شہر گندگی سے بھری ہوئی ہے۔۔بیان میں کہاگیا کہ سکولوں میں سہولیات نہیں ہسپتالوں اور بی ایچ یوز میں ادویات نہیں۔ لیکن پختہ سڑکوں کو دوبارہ بنانا فنڈز کے ضیاع کے علاہ کچھ نہیں۔بیان میں کہاگیا کہ سڑکوں میں فنڈز لگانے کے بجائے دیگر بنیادی ضروریات پر فنڈز کو لگایا جائے جس سے عوام کو بھی فائدہ ملے اور فنڈز بھی ضیائع نہ ہو۔