مختلف وزارتوں اور محکموں میں ہزاروں سرکاری اسامیاں ختم کردی گئیں

اسلام آباد (انتخاب نیوز) وفاقی حکومت کے رائٹ سائزنگ اقدامات کے تحت مختلف وزارتوں اور محکموں میں ہزاروں سرکاری اسامیاں ختم کردی گئیں، جس کا مقصد اخراجات میں کمی اور انتظامی ڈھانچے کو موثر بنانا ہے۔ دستاویزات کے مطابق گریڈ 1 سے لے کر گریڈ 22 تک مجموعی طور پر 32 ہزار 70 اسامیاں ختم کی گئی ہیں، جن کا سالانہ مالیاتی بوجھ 30 ارب روپے سے زائد بنتا ہے۔ رپورٹ میں بتایا گیا ہے کہ کابینہ ڈویژن نے مزید 7 ہزار 826 ایسی ”ڈائنگ اسامیاں“ بھی شناخت کی ہیں، جو آہستہ آہستہ ختم کی جائیں گی۔ ان اسامیوں کا سالانہ مالیاتی حجم 6 ارب روپے سے زائد بتایا گیا ہے۔ ختم کی گئی اسامیوں میں گریڈ 17 سے گریڈ 22 کی 1102 اسامیاں شامل ہیں جبکہ گریڈ 1 تا 16 کی 30 ہزار 968 اسامیاں بھی ختم کی گئی ہیں۔ تفصیلات کے مطابق گریڈ 1 کی 7305، گریڈ 2 کی 2853، گریڈ 4 کی 2456، گریڈ 5 کی 2887، گریڈ 14 کی 1274 اور گریڈ 16 کی 1340 اسامیاں ختم کی جاچکی ہیں۔ ان اقدامات کا مقصد سرکاری محکموں کو سست اور غیر ضروری بوجھ سے نجات دینا، ساتھ ہی مالی وسائل کی بچت اور کارکردگی میں بہتری لانا ہے۔ حکومتی ذرائع کے مطابق یہ عمل مرحلہ وار جاری رہے گا۔