اسرائیل کے ایران پر تازہ حملے، دو جنرلز، 3 جوہری سائنسدان، 65 شہری جاں بحق، اصفہان میں ایٹمی تنصیبات تباہ
کراچی (مانیٹرنگ ڈیسک) اسرائیل نے اپنی ایئرفورس کو ایران پر حملے کی مکمل آزادی دے دی، ایران کی جانب سے گزشتہ رات سے اب تک تقریباً 200 بیلسٹک میزائل اسرائیل پر داغے جانے کے بعد اسرائیلی حکومت نے کارروائی کے لیے فری ہینڈ دے دیا، تازہ اسرائیلی حملے میں مزید دو جنرلز، 3 جوہری سائنسدانوں، 20 بچوں سمیت 65 ایرانی شہری جاں بحق ہوگئے۔ ٹائمز آف اسرائیل کی رپورٹ کے مطابق اسرائیلی فوج ( آئی ڈی ایف) نے دعویٰ کیا ہے کہ اس نے ایران کی اصفہان نیوکلیئر سائٹ پر حملہ کر کے اہم تنصیبات اور لیبارٹریز کو تباہ کر دیا ہے، مزید دو ایرانی جنرل کو بھی مار دیا گیا ہے۔ جنرل مہدی ربانی ملٹری آپریشن ڈپٹی چیف تھے ، جنرل غلام رضا محرابی جنرل اسٹاف کے ہیڈ آف انٹیلیجنس تھے۔ اسرائیل کا کہنا ہے کہ وہ ایرانی جوہری سائنسدانوں، فوجی حکام، اور میزائل لانچنگ سسٹمز کو بھی نشانہ بنا رہا ہے، اور کارروائیاں جاری رکھے گا۔
