پنجاب اور کراچی سے بھارتی خفیہ ایجنسی ”را“ کے 10 سہولت کار گرفتار کرلیے، سی ٹی ڈی

لاہور، کراچی (ویب ڈیسک) انسداد دہشتگردی ڈیپارٹمنٹ پنجاب، سندھ پولیس اور حساس اداروں کی پنجاب اور کراچی میں مشترکہ کارروائیوں کے دوران بھارتی خفیہ ایجنسی ’را‘ کے 10 ایجنٹس کو گرفتار کرنے کا دعویٰ کیا گیا ہے۔ قانون نافذ کرنیوالے اداروں کے مطابق ملزمان بھارتی خفیہ ایجنسی کو حساس مقامات کی معلومات، فنڈنگ، سہولت کاری اور تخریب کاری میں معاونت فراہم کرتے تھے۔ انسداد دہشتگردی ڈپارٹمنٹ پنجاب نے صوبے کے مختلف اضلاع میں کارروائیاں کرتے ہوئے بھارتی خفیہ ایجنسی ’را‘ کے 6 سہولت کاروں کو گرفتار کرلیا ہے۔ سی ٹی ڈی نے دبئی سے فنڈنگ کرنے والا ’را‘ کا سہولت کار رنگے ہاتھوں گرفتار کر لیا۔ سی ٹی ڈی حکام کے مطابق بھارتی بارڈر سکیورٹی فورس (بی ایس ایف) سے بم حاصل کرنے والے دہشت گرد بھی ان کامیاب کارروائیوں کے دوران پکڑا گیا جبکہ بہاولپور میں مسجد اور ریلوے اسٹیشن پر حملے کی سازش کو ناکام بناتے ہوئے منصوبہ ساز قانون کے شنکجے میں آگئے۔ دوسری جانب سندھ پولیس کے اسپیشل انویسٹی گیشن یونٹ (ایس آئی یو) نے حساس اداروں کے ساتھ مشترکہ کارروائی کرتے ہوئے کراچی کے علاقے ملیر قائدآباد سے بھارتی خفیہ ایجنسی ”را“ سے تعلق رکھنے والے چار خطرناک ایجنٹس کو گرفتار کرلیا۔ ایس ایس پی ایس آئی یو شعیب میمن نے سی آئی اے سینٹر میں پریس کانفرنس کے دوران اس اہم کامیابی کی تفصیلات بتاتے ہوئے کہا کہ گرفتار ملزمان بھارتی کرنل رنجیت سے مسلسل رابطے میں تھے اور انہیں پاکستان کی حساس تنصیبات کی تصاویر فراہم کرتے رہے۔ شعیب میمن نے بتایا کہ ملزمان کراچی میں ملک دشمن سرگرمیوں میں ملوث تھے اور انہوں نے کراچی کے مختلف علاقوں میں تخریب کاری کے منصوبے بنا رکھے تھے۔ حساس اداروں کی اطلاع پر ملیر قائد آباد میں مشترکہ کارروائی کی گئی، جہاں چار ملزمان کو رنگے ہاتھوں گرفتار کیا گیا۔ پریس کانفرنس کے دوران ایس ایس پی نے بتایا کہ گرفتار افراد کے قبضے سے چار دستی بم، پسٹلز، ایک مشکوک گاڑی اور دیگر تخریبی مواد برآمد ہوا ہے۔ انہوں نے کہا، ہم نے ملزمان کے تمام موبائل ڈیٹا کا بھی تجزیہ مکمل کرلیا ہے، جس سے مزید شواہد ملے ہیں کہ یہ افراد بھارتی ایجنسی را کے لیے کام کر رہے تھے۔