اسٹیل مل کو جدید بنانے کیلئے پاکستان اور روس کے درمیان معاہدہ طے

کراچی (انتخاب نیوز) پاکستان اور روس نے اسٹیل ملز کی بحالی کیلئے معاہدے پر دستخط کر دیے۔ وزارت صنعت و پیداوار کے اعلامیے کے مطابق ماسکو میں وزیراعظم کے معاون خصوصی برائے صنعت و پیداوار ہارون اختر خان کی قیادت میں روس کے ساتھ وزارتِ صنعت و پیداوار کے وفد کا معاہدہ ہوا ہے۔ پاکستان روس معاہدے میں پاکستان اسٹیل ملز کو جدید بنانے کا فیصلہ کیا گیا ہے، پاکستان اسٹیل ملز کی بحالی کے لیے روس کے ساتھ شراکت داری اور نئی صنعتی تاریخ رقم ہوگی۔ سیکرٹری صنعت و پیداوار سیف انجم اور روس کے وادیم ویلیچکو نے معاہدے پر دستخط کیے۔ ہارون اختر خان کا کہنا ہے کہ پاکستان اسٹیل ملز کی بحالی وزیراعظم کے وڑن کی عکاسی کرتی ہے، معاہدہ پاکستان اسٹیل ملز کی ترقی اور صنعتی مستقبل کے لیے سنگ میل ہے۔