بلوچستان میں جبری گمشدگیوں کے کیسز کیلئے جسٹس ریٹائرڈ امان اللہ یاسین زئی ممبر مقرر

کوئٹہ(یو این اے )جسٹس ریٹائرڈ ارشد حسین شاہ کی بطور چیئرمین تعیناتی کے بعد جبری گمشدگیوں سے متعلق انکوائری کمیشن کے کیسز نمٹانے میں پیشرفت سامنے آئی ہے۔ اعلامیے کے مطابق وفاقی حکومت نے جبری گمشدگیوں پر انکوائری کمیشن کی تشکیلِ نو کی ہے۔جسٹس ارشد حسین شاہ کے عہدہ سنبھالنے کے بعد جولائی میں 70 کیسز نمٹائے گئے جبکہ 15 نئی شکایات رجسٹرڈ ہوئیں۔ اب تک کمیشن کو 10 ہزار 607 کیسز موصول ہوئے جن میں سے 21 جولائی 2025 تک 8 ہزار 777 کیسز نمٹائے جا چکے ہیں۔بلوچستان کیلئے جسٹس ریٹائرڈ امان اللہ یاسین زئی کو ممبر مقرر کیا گیا ہے، سندھ کیلئے جسٹس ریٹائرڈ نذر اکبر، اسلام آباد کیلئے ریٹائرڈ جج محمد بشیر جبکہ خیبر پختونخوا میں کیسز نمٹانے کیلئے جسٹس ریٹائرڈ سید افسر شاہ کو تعینات کیا گیا ہے۔