صدر ٹرمپ امن کےلیے کوششوں پر نوبیل امن انعام کے حقدار ہیں، بلاول بھٹو

ویب ڈیسک :پاکستان پیپلزپارٹی کے چیئرمین بلاول بھٹو زرداری سے امریکی نیشنل سیکیورٹی کونسل کے سینئر ڈائریکٹر رکی گل کی زرداری ہاؤس میں ملاقات ہوئی، جس میں دوطرفہ تعلقات کے فروغ پر بات چیت کی گئی۔پیپلزپارٹی کی جانب سے جاری اعلامیے میں بتایا گیا کہ سابق وزیرخارجہ بلاول بھٹو زرداری کے ہمراہ پاکستان کی خاتون اول آصفہ بھٹو زرداری بھی شریک تھیں جبکہ اس موقع پر سینیٹر شیری رحمٰن اور امریکی ناظم الامور نٹالی بیکر بھی موجود تھے۔

اعلامیے میں بتایا گیا ہے کہ چیئرمین بلاول بھٹو زرداری اور امریکی نیشنل سیکیورٹی کونسل میں جنوبی و وسطی ایشیا کے امور کے سینئر ڈائریکٹر رکی گل کے درمیان دوطرفہ تعلقات کے فروغ پر بات چیت کی گئی، اس کے علاوہ علاقائی سلامتی، تجارتی و سفارتی تعاون کے مختلف پہلوؤں پر تبادلہ خیال کیا گیا۔اعلامیے میں مزید کہا گیا ہے کہ اس موقع پرچیئرمین بلاول بھٹو زرداری نے کہا کہ پاک-بھارت جنگ بندی میں امریکی صدر ڈونلڈ ٹرمپ کا کردار ناقابل فراموش تھا، صدر ٹرمپ کی امن کے لیے کی گئی کوششیں بین الاقوامی سطح پر تسلیم کی جانی چاہئیں اور وہ نوبیل امن انعام کے حقدار ہیں۔اعلامیے کے مطابق چیئرمین بلاول بھٹو زرداری نے پاکستان اور امریکا کے درمیان حالیہ تجارتی معاہدوں کا خیر مقدم کیا، ان کا کہنا تھا کہ پاکستان عالمی برادری کے ساتھ تجارتی تعاون بڑھانے کا خواہاں ہے۔

چیئرمین پاکستان پیپلزپارٹی بلاول بھٹو زرداری نے مزید کہا کہ امریکا کے ساتھ ہونے والے حالیہ تجارتی معاہدے خطے میں ترقی و خوشحالی کا نیا باب کھول سکتے ہیں۔اعلامیے میں کہا گیا ہے کہ امریکی نیشنل سیکیورٹی کونسل میں جنوبی و وسطی ایشیا کے امور کے سینئر ڈائریکٹر رکی گل نے چیئرمین بلاول بھٹو زرداری کے لیے نیک تمناؤں کا اظہار کیا، انہوں نے امریکا کی جانب سے ہر سطح پر پاکستان سے تعاون بڑھانے کے عزم کا اظہار کیا۔