سیلاب متاثرہ علاقوں میں فوج کی امدادی کارروائیاں جاری ہیں، ڈی جی آئی ایس پی آر

اسلام آباد(انتخاب نیوز) پاکستان کی فوج کے شعبہ تعلقات عامہ (آئی ایس پی آر) کے سربراہ لیفٹیننٹ جنرل احمد شریف چوہدری نے کہا ہے کہ آرمی چیف کی ہدایت پر سیلاب متاثرہ علاقوں میں فوج کے افسران اور جوان امدادی کارروائیوں میں مصروف ہیں۔ بدھ کو اسلام آباد میں وفاقی وزیر اطلاعات عطااللہ تارڑ اور چیئرمین این ڈی ایم اے کے ہمراہ پریس کانفرنس کرتے ہوئے ڈی جی آئی ایس پی آر نے کہا کہ فوج مشکل حالات میں اپنے عوام کے ساتھ کھڑی ہے۔ اب تک فوج 28 ہزار لوگوں کو ریسکیو کر چکی ہے۔ انہوں نے بتایا کہ سیلاب سے متاثرہ علاقوں میں امدادی کارروائیوں کے دوران فوج کے دو جوان شہید جبکہ تین زخمی ہوئے ہیں۔ صوبہ خیبرپختونخوا اور گلگت میں سیلاب سے متاثر ہونے والے تین بڑے پلوں کو بحال کردیا گیا جبکہ آزاد کشمیر میں بھی بحالی کے لیے فوج کی بٹالین مصروف عمل ہیں۔ ڈی جی آئی ایس پی آر نے بتایا کہ فوج کے انجینئرز نے ضلعی انتظامیہ کے ساتھ مل کر سڑکیں کلیئر کی ہیں اور اس وقت کرتار پور میں ایک بڑا ریسکیو آپریشن جاری ہے۔ فوج نے سیلاب متاثرہ علاقوں میں 29 میڈیکل کیمپس قائم کیے ہیں۔ انہوں نے کہا کہ فوج کا ان حالات میں بھی خارجیوں کے خلاف آپریشن جاری ہے تاکہ وہ کسی صورت حال کا فائدہ نہ اٹھا سکیں۔ وفاقی وزیر اطلاعات عطاءاللہ تارڑ نے کہا کہ پنجاب کے تین دریاﺅں میں سیلابی صورتحال ہے۔ این ڈی ایم اے پنجاب ڈیزاسٹر مینجمنٹ اتھارٹی سے مکمل رابطے میں ہے۔