کوسٹ گارڈز کی گوادر میں کارروائیاں، کروڑوں روپے مالیت کی منشیات قبضے میں لے لی
اوتھل (نامہ نگار) پاکستان کوسٹ گارڈزکی گوادر کے علاقے پیشو گان اور پلیری میں کارروائیاں، بھاری مقدار میں اعلیٰ کوالٹی کی منشیات برآمد، منشیات کی عالمی مارکیٹ میں مالیت 134.43 ملین ڈالر کے لگ بھگ ہے۔ تفصیلات کے مطابق پاکستان کوسٹ گارڈزنے منشیات اسمگلنگ کی مصدقہ اطلاعات کی بنیاد پرگوادر کے علاقے پلیری میں جھاڑیوں میں چھپائی گئی 1400 کلوگرام چرس، 105 کلوگرام میتھ آئس، 8 کلو گرام ہیروئن اور 6.5 کلو گرام آفیون برآمد کرلی۔ جبکہ ایک اور کارروائی میں پیشوگان کے ساحلی راستے پسوگیپ پر اسنیپ چیکنگ کے دوران 476 کلو گرام اعلیٰ کوالٹی کی چرس برآمد کرلی گئی۔ خدشہ ہے کہ یہ منشیات سمندر کے راستے بیرون ملک اسمگل ہو نا تھی۔ پکڑی جانے والی منشیات کی عالمی مارکیٹ میں مالیت 134.43 ملین ڈالر کے لگ بھگ ہے۔ واضح رہے کہ پاکستان کوسٹ گارڈز منشیات اور ہر طرح کی اسمگلنگ اور منشیات کی روک تھام کرتے ہوئے ملکی معیشت کو مستحکم کرنے میں اپنا کردار ادا کرتی رہے گی۔ منشیات ایک ناسور ہے جو نوجوانوں کی صحت، ذہانت اور مستقبل کو تباہ کر دیتی ہے یہ معاشرے کی بنیادوں کو کھوکھلا کرتی ہے اور خاندانوں میں بربادی کا سبب بنتا ہے۔
