فش ہاربر گوادر میں کاروباری حضرات کو درپیش مسائل حل کرائیں گے، مولانا ہدایت الرحمن کی یقین دہانی

گوادر (بیورو رپورٹ) ایم پی اے گوادر مولانا ہدایت الرحمن بلوچ کا کاروباری حضرات کی دعوت پر دوبارہ فش ہاربر گوادر کا دورہ، فش ہاربر میں سہولیات کی کمی سے متعلق درخواست موصول، خدشات دور کرانے کی یقین دہانی۔ ایم پی اے گوادر مولانا ہدایت الرحمن بلوچ نے آج فش ہاربر گوادر کے کاروباری حضرات و مول ہولڈرز کے دعوت پر دوبارہ فش ہاربر گوادر کا دورہ کیا اور کاروباری شخصیات سے ملاقات کی۔ ملاقات میں کاروباری شخصیات و مول ہولڈرز نے فش ہاربر گوادر میں سہولیات کی کمی سے متعلق باقاعدہ تحریری طور پر خدشات پیش کئے جس میں کہا گیا کہ گوادر پورٹ اتھارٹی کی جانب سے ایک نوٹیفکیشن جاری ہوا ہے جس میں لانچوں کی آمد کے لئے شیڈول جاری کیا گیا جبکہ خالی لانچوں کی آمد پر پابندی عائد کی جاری ہے جبکہ دوسری جانب لانچوں کی انٹری کے لئے بھی ایک طرف پورٹ کی وجہ سے نیوی منع کرتا ہے جبکہ دوسری طرف جیٹی کی ناقص حالت کی وجہ سے لانچوں کو ڈاک کرنے میں مسلسل نقصانات کا سامنا کرنا پڑ رہا ہے۔ کاروباری شخصیات نے کہا کہ سب لوگوں سے مینٹینیس کے نام سے باقاعدہ ٹیکسز اور چارجز وصول کئے جاتے ہیں یہاں تک کہ باہر بیٹھے ٹَب والوں سے بھی ٹیکسز وصول کئے جاتے ہیں مگر صفائی اور مینٹینیس کی صورتحال انتہائی ناقص ہے۔ مول کا چھت شکستہ حالت میں ہے جبکہ انٹری گیٹ پر اونچے اسپیڈ بریکر اور جیٹی پر گڑھوں کی وجہ سے گاڑیوں کو بھی نقصان پہنچ رہا ہے۔ کاروباری شخصیات نے درخواست کی کہ ایم پی اے گوادر مولانا ہدایت الرحمان بلوچ متعلقہ حکام سے رابطہ کرکے ان مسائل کے حل کے لئے کوششیں کریں۔ مولانا ہدایت الرحمن بلوچ نے اس متعلق چیئرمین پورٹ اتھارٹی سے ملاقات کرکے تمام خدشات دور کرنے کی یقین دہانی کرائی۔