وفاقی وزیر ریلوے اور وزیراعلیٰ بلوچستان کی زیر صدارت اجلاس، پیپلز ٹرین سمیت جوائنٹ وینچر منصوبوں کے آغاز پر اصولی اتفاق

کوئٹہ (صباح نیوز) وفاقی وزیر ریلویز حنیف عباسی اور وزیر اعلیٰ بلوچستان سرفراز بگٹی کی زیر صدارت پاکستان ریلویز اور حکومت بلوچستان کا مشترکہ اجلاس۔ بلوچستان میں پیپلز ٹرین سروس سمیت مختلف جوائنٹ وینچر منصوبوں کے آغاز پر اصولی اتفاق۔ وفاقی وزیر ریلویز حنیف عباسی نے کہا کہ پاکستان ریلویز کی 78 سالہ تاریخ میں پہلی بار صوبائی سطح پر ڈیولوشن کا تاریخی فیصلہ کیا۔ مقامی ریلوے سروسز میں تینوں صوبوں نے دلچسپی ظاہر کی، عملی قیادت بلوچستان نے سنبھالی۔ وزیر اعلیٰ بلوچستان سرفراز بگٹی کی قیادت میں ریلویز بلوچستان میں جدید اور مو¿ثر حکمت عملی کے تحت آگے بڑھ رہی ہے۔ پیپلز ٹرین سروس پاکستان ریلویز اور حکومت بلوچستان کے باہمی اشتراک کی شاندار مثال ہے۔ اجلاس سے خطاب کرتے ہوئے وزیر اعلیٰ بلوچستان سرفراز بگٹی کا کہنا تھا کہ پیپلز ٹرین سروس منصوبے پر تیز رفتار اور عملی پیش رفت چاہتے ہیں۔ نئے ریلوے اسٹیشنز کی تعمیر اور موجودہ انفراسٹرکچر کی اپ گریڈیشن کے لیے حکومت بلوچستان مطلوب وسائل فراہم کرے گی۔ پیپلز ٹرین سروس کے لیے ایک ارب چالیس کروڑ روپے رواں ہفتے جاری کر دیے جائیں گے۔سریاب تا کچلاک پیپلز ٹرین سروس کی کامیابی کے بعد مستونگ سے پشین اور دیگر علاقوں تک دائرہ وسیع کیا جائے گا۔ ریلوے سسٹم کی بحالی اور عوام کو سستی، محفوظ سفری سہولیات کی فراہمی حکومت بلوچستان کی ترجیحات میں شامل ہے۔علاوہ ازیں وفاقی وزیر ریلویز اور وزیر اعلیٰ بلوچستان کا ریلویز فٹ بال گراﺅنڈ کا دورہ ، کھیلوں کے فروغ اور پاکستان ریلویز کی اراضی پر مشترکہ منصوبے شروع کرنے پر اتفاق۔