گھوٹکی سے مسافروں کا اغوا، 14 مغوی بازیاب کرالیے، دیگر کی بازیابی کیلئے آپریشن جاری، پولیس حکام

کراچی (ویب ڈیسک) صوبہ سندھ کے ضلع گھوٹکی میں گڈوکشمور لنک روڈ پر پیر کی شب صادق آباد سے کوئٹہ جانے والی بس کے اغوا کا واقعہ پیش آیا، جس میں ڈاکوﺅں نے اوباڑو کے قریب بس روک کر 19 افراد کو اغوا کرلیا۔ واقعے کے فوری بعد پولیس اور رینجرز نے مسافروں کو بازیاب کرانے کے لیے کارروائی شروع کی اور اب تک 14 افراد کو محفوظ بازیاب کروا لیا گیا ہے۔ واقعے کے دوران ایک مسافر کو دل کا دورہ پڑ گیا جس کے نتیجے میں وہ جاں بحق ہوگیا۔ پولیس کے مطابق جاں بحق مسافر کی شناخت کریم بخش بلیدی کے نام سے ہوئی ہے۔ جاں بحق مسافر کی لاش گنے کی فصل سے برآمد ہوئی اور اسے فوری طور پر ہسپتال اوباڑو منتقل کردیا گیا۔ جبکہ پانچ سے زائد زخمی مسافر رحیم یار خان اسپتال منتقل کیے گئے ہیں۔ ڈی آئی جی سکھر فیصل عبداللہ چاچڑ نے بتایا کہ قانون نافذ کرنے والے اداروں نے رات بھر جاری آپریشن کے دوران کچے کی طرف جانے والے تمام راستے بند کر دیے، جس کے باعث ڈاکو مغویوں کو کچے کی طرف لے جانے میں ناکام رہے۔ بازیاب کرائے گئے افراد میں ذوالفقار، عبدالنبی، عمیر، سید علی عماد، فیروز عرفان سمیت دیگر شامل ہیں۔ جبکہ دھند کی وجہ سے پولیس کو آپریشن میں دشواری کا سامنا ہے۔ ڈی آئی جی کے بیان کے مطابق علاقے میں ناکہ بندی اور ڈاکوﺅں کے تعاقب کا سلسلہ جاری ہے۔ اس کارروائی میں ایس ایس پی خیرپور، ایس ایس پی سکھر اور ایس ایس پی گھوٹکی سمیت سکھر رینج کے اہلکار شامل ہیں۔ علاقائی پولیس کا کہنا ہے کہ اغوا کے دیگر افراد کو بازیاب کرانے کے لیے آپریشن جاری ہے اور ڈاکوﺅں کو گرفتار کرنے کے لیے تمام ممکنہ اقدامات کیے جا رہے ہیں تاکہ ضلع میں امن و امان کی صورتحال بحال ہوسکے۔