فیول پرائس ایڈجسٹمنٹ کی مد میں ایک ماہ کے لیے بجلی 48 پیسے فی یونٹ مہنگی ہونے کا امکان

اسلام آباد (ویب ڈیسک) ایک ماہ کے لیے بجلی 48 پیسے فی یونٹ مہنگی ہونےکا امکان ہے، سینٹرل پاور پرچیزنگ ایجنسی نے دسمبر کے ماہانہ فیول پرائس ایڈجسٹمنٹ کی مد میں درخواست دائر کر دی ہے۔ سی پی پی اے کی درخواست پر نیپرا اتھارٹی 29 جنوری کو سماعت کرے گی۔ منظوری کی صورت میں کے الیکٹرک اور ڈسکوز کے صارفین پر مجموعی طور پر 4 ارب روپے سے زائد کا اضافی بوجھ پڑنے کا امکان ہے۔ درخواست میں مو¿قف اختیار کیا گیا ہے کہ دسمبر کے مہینے میں ملک بھر میں بجلی کی مجموعی پیداوار 8 ارب 48 کروڑ 70 لاکھ یونٹس رہی جبکہ ڈسکوز کو 8 ارب 20 کروڑ 80 لاکھ یونٹس بجلی فراہم کی گئی۔ سی پی پی اے کے مطابق اس بجلی کی فی یونٹ لاگت 9 روپے 62 پیسے ریکارڈ کی گئی جو سابق مہینوں کے مقابلے میں زیادہ ہے، اسی اضافے کو صارفین پر منتقل کرنے کیلئے ایڈجسٹمنٹ مانگی گئی ہے۔