نئی دہلی،کورونا وائرس، بیوی نے شوہر کو گھر کے اندر آنے سے منع کردیا

نئی دہلیو کورونا وائرس کی وبا نے اپنوں کو بھی بیگانہ کردیا ہے، بھارتی خاتون نے اپنے شوہر کو ٹیسٹ کرائے بغیر گھر میں داخل ہونے سے روک دیا۔تفصیلات کے مطابق بھارتی ریاست آندھراپردیش میں کورونا وائرس کے کیسز میں تیزی اضافہ ہورہا ہے جبکہ عوام میں اس وبا کے حوالے سے بے حد تشویش پائی جاتی ہے۔ کورونا وائرس کے خوف میں مبتلا ایک خاتون نے کورونا ٹیسٹ کروانے تک شوہر کو گھر کے اندر آنے سے منع کردیا۔بھارتی میڈیا کے مطابق نیلور کے علاقے میں سنار کی دکان میں کام کرنے والا ملازم کرونا لاک ڈاؤن کی وجہ سے اپنے آبائی گھر وینکٹ گری بروقت نہیں پہنچ سکا تھا۔تاہم کافی دنوں کی بے انتہا کوشش کے بعد جب وہ اپنے گھر پہنچا تو کوئی اور نہیں اسی کی بیوی نے اسے گھر میں آنے سے منع کردیا، بیوی کا کہنا تھا کہ پہلے اپنا کورونا ٹیسٹ کرواؤ جس کے منفی آنے کے بعد گھر میں آنے کی اجازت ملے گی، خاتون کا کہنا ہے کہ اس نے یہ اقدام اپنے خاندان اور پڑوسیوں کی سلامتی کے پیش نظر کیا ہے۔