خانہ کعبہ مسجد الحرام اورمسجد نبوی میں تمام کو رونا پابندیاں ختم،رکاوٹیں ہٹادی گئیں
مکہ المکرمہ : کرونا کی شدت کم ہونے کے بعد مسجد الحرام میں پابندیاں ختم کردی گئیں،خانہ کعبہ کے دروازے سب کے لیے کھول دیئے گئے، سماجی فاصلے کے نشان ہٹا دیئے گئے، خانہ کعبہ اور مقام ابراہیم کے گرد رکاوٹیں ہٹا دی گئیں، لوگوں کی بڑی تعداد نے مطعاف میں نماز فجر ادا کی۔ اتوار کو الحرمین الشریفین انتظامیہ نے مکہ مکرمہ اور مسجد نبوی ﷺ میں کورونا وبا کے پھیلا وکی روک تھام کے لیے عائد کی گئی سماجی فاصلے کی پابندیاں ہٹا د یں ہیں۔ جس کے بعد مسجدالحرام اور مسجد نبویﷺ میں سماجی فاصلے کے بغیر نمازیں ادا کی جائیں گی۔ الحرمین الشریفین انتظامیہ کی جانب سے جاری اعلامیے کے مطابق کورونا وبا سے قبل کی صفوں کی اصل حالت کو بحال کیا جا رہا ہے جس کے بعد اب مکمل افرادی گنجائش کے ساتھ نمازیں ادا کی جاسکیں گی۔ انتظامیہ کے مطابق مسجدالحرام کے صحن مطاف میں بھی سماجی فاصلے کے لیے لگائی گئی علامتیں ہٹا دی گئی ہیں۔ طواف یا سعی کرنے والوں کے لیے سماجی فاصلے کا اصول ختم کر دیا گیا ہے تاہم ماسک کی پابندی برقرار ہے۔ انتظامیہ کا کہنا ہے کہ خانہ کعبہ اور مقام ابراہیم علیہ السلام کے گرد لگائے گئے بیریئر بھی ہٹا دیے گئے ہیں۔
