عثمان بزدار کا پنجاب کی یونیورسٹیوں میں بلوچستان کی طلبہء کیلئے مختص نشتیں دگنی کرنے کا اعلان

کو ئٹہ:وزیراعلیٰ پنجاب سردار عثمان بزردار نے پنجاب کی یونیورسٹیوں میں بلوچستان کی طالبات کے لئے مختص نشستیں دگنی کرنے کا اعلان کرتے ہوئے کہا ہے کہ پنجاب بڑے بھائی کی حیثیت سے بلوچستان کے ہر شعبے میں معاونت جارے رکھے گا، بلوچستان اور پنجاب کے سرحد پر چیکنگ کے نظام کو آسان بنایا جائے گا، ملک کر صوبوں اور ملک کی خدمت کریں گے۔ ان خیالات کا اظہار انہوں نے ہفتے کو کوئٹہ پہنچنے کے بعد وزیراعلیٰ بلوچستان میر عبدالقدوس بزنجو، وزراء اور اراکین بلوچستان اسمبلی سے وزیراعلیٰ بلوچستان سیکرٹریٹ میں ملاقات کے موقع پر بات چیت کرتے ہوئے کیا۔ ملاقات کے موقع پر ڈپٹی اسپیکر قومی اسمبلی قاسم خان سوری اور حزب اختلاف کے اراکین صوبائی اسمبلی بھی تھے۔ وزیراعلیٰ پنجاب سردار عثمان بزدار نے کہا کہ پنجاب بڑے بھائی کی حیثیت سے بلوچستان کی ہر شعبہ میں معاونت جاری رکھے گا، وہ بلوچستان کو اپنا دوسرا گھر سمجھتے ہیں بلوچستان کے عوام بھی پنجاب کو اپنا گھر سمجھیں،بلوچستان کے عوام اور عوامی نمائندوں کو پنجاب میں ہمیشہ بھرپور عزت و احترام ملے گا۔ انہوں نے پنجاب حکومت بلوچستان کے علاقے رکھنی میں ہسپتال بنائے گی اسکے علاوہ بلوچستان کے دیگر اضلاع میں بھی اسپتال بنا کر دینگے۔ اس موقع پر وزیر اعلی پنجاب نے پنجاب کی یونیورسٹیوں میں بلوچستان کی طالبات کے لیے مختص نشستیں دگنا کرنے کا اعلان کیا اور کہاکہ پنجاب اور بلوچستان کے سرحد پر چیکنگ کے نظام کو آسان بنایا جائے گا بلکہ بلوچستان کے صحت ورکرز کو پنجاب میں تربیت کی سہولت دینگے۔ انہوں نے کہا کہ ہم نے مل کر پاکستان اور اپنے صوبوں کی خدمت کرنا ہے۔ وزیراعلیٰ بلوچستان میر عبدالقدوس بزنجو نے وزیراعلیٰ پنجاب کا شکریہ ادا کرتے ہوئے کہا کہ بلوچستان کی عوام صحت مواصلات تعلیم سمیت دیگر شعبوں میں پنجاب کے تعاون کو قدر کی نگاہ سے دیکھتے ہیں، وزیر اعلی سردار عثمان بزدار کے دور حکومت میں دونوں صوبوں کے مابین معاونت میں اضافہ ہوا۔