ختم نبوت سے متعلق آیت سندھ اسمبلی کی مرکزی دیوار پر تحریر
کراچی (انتخاب نیوز) سندھ اسمبلی میں تحریک لبیک پاکستان کا تحفظ ختم نبوت کیلئے بڑا اقدام، قرآن پاک کی ختم نبوت سے متعلق آیت مبارکہ کو سندھ اسمبلی کی مرکزی دیوار پر تحریر کر دیا۔ مذکورہ آیت کے دائیں جانب حضور اکرم ﷺکی فضیلت سے متعلق آیت بھی تحریر کی گئی ہے۔ واضح رہے کہ گزشتہ سال ماہ ستمبر میں ٹی ایل پی کے پارلیمانی لیڈر مفتی محمد قاسم فخری نے قرارداد پیش کی تھی، مذکورہ قرارداد میں مطالبہ کیا گیا تھا کہ ختم نبوت سے متعلق آیات اور احادیث مبارکہ سنہری الفاظ میں تحریر کی جائیں۔ تحریک لبیک پاکسان کے امیر کراچی مفتی محمد قاسم فخری نے کہا کہ عقیدہ ختم نبوت ہر مسلمان کے ایمان کا لازمی جز ہے، عقیدہ ختم نبوت کے تحفظ کے لئے ہر ممکن کوشش کرتے رہیں گے۔ مفتی محمد قاسم فخری نے کہا کہ بانی تحریک لبیک پاکستان علامہ حافظ خادم حسین رضوی کی تحفظ ناموس رسالت و ختم نبوت کے لئے لازوال جدوجہد ہمیشہ یاد رکھی جائے گی، مرکزی امیر ٹی ایل پی علامہ حافظ سعد حسین رضوی کی قیادت میں تحفظ ختم نبوت اور تحفظ ناموس رسالت کے لیے اپنی جدوجہد جاری رکھیں گے۔ انہوں نے کہا کہ اس اہم موقع پر شہدائے ختم نبوت کی قربانیوں کوخراج تحسین پیش کرتے ہیں، معزز ایوان سندھ اسمبلی بھی اس زبردست کارنامے پر مبارک باد کا مستحق ہے۔
