ٹوئٹر نے بھارت میں خالصہ ایڈ کے سربراہ روی سنگھ کا اکاؤنٹ بند کردیا
نئی دہلی (مانیٹرنگ ڈیسک) ٹوئٹر نے بھارت میں خالصہ ایڈ کے بانی روی سنگھ کا اکاؤنٹ بند کردیا ہے۔کشمیر میڈیا سروس کے مطابق روی سنگھ نے فیس بک پر اکاؤنٹ کی ایک تصویر شیئر کرتے ہوئے لکھاکہ بھارت میں میرے ٹوئٹر اکاؤنٹ پر پابندی لگا دی گئی ہے،یہ ہے بی جے پی کی جمہوریت کا اصل چہرہ۔ انہوں نے کہاکہ سکھوں کے سوشل میڈیا اکاؤنٹس پر پابندی لگانے سے ہمیں اپنی آواز اٹھانے سے نہیں روکا جاسکتا بلکہ ہم اپنی آواز مزید بلند کریں گے۔ خالصہ ایڈ برطانیہ میں قائم ایک غیر سرکاری تنظیم ہے جو ان اہم تنظیموں میں شامل ہے جنہوں نے 2020ء میں سمیوکت کسان مورچہ کی قیادت میں کسانوں کے احتجاج کو لاجسٹک مدد فراہم کی۔ اس نے بیرونی دنیا کی توجہ تحریک کی طرف مبذول کرانے میں بھی کردار ادا کیا۔ اس کے رضاکاروں نے کسانوں کے لیے خوراک اور دیگر ضروری اشیا کا بندوبست کرنے میں مدد کی۔ خالصہ ایڈ کو 2021ء میں دنیا بھر میں کیے گئے انسانی کاموں کے لیے امن کے نوبل انعام کے لیے نامزد کیا گیا تھا۔ نوبل کی نامزدگی کینیڈین سیاستدانوں ٹم اپل، پیٹرک بران اور پربمیت سنگھ سرکاریا کی طرف سے کی گئی تھی۔
