شہبازشریف کا ادویات سکینڈل کی تحقیقات کا مطالبہ
اسلام آباد: پاکستان مسلم لیگ (ن)کے صدر اور قائد حزب اختلاف شہبازشریف نے ادویات سکینڈل کی تحقیقات کا مطالبہ کرتے ہوئے کہاہے کہ پارلیمانی کمیٹی تشکیل دی جائے جو ادویات سکینڈل کی شفاف تحقیقات کرے۔ جمعہ کواپنے ایک بیان میں شہباز شریف نے کہاکہ وزیراعظم عمران خان آٹے چینی کی طرح دوائی سکینڈل کے بھی براہ راست ذمہ دار ہیں۔بھارت سے ان ادویات کی درآمد کی منظوری کابینہ کے اجلاس میں خود وزیراعظم عمران خان نے دی۔ انہوں نے کہاکہ جان بچانے والی ادویات کی آڑ میں دیگر ادویات کی بھارت سے درآمد سنگین جرم ہے۔ مسلم لیگ (ن) کے دور میں خدانخواستہ یہ ہوا ہوتا تو عمران نیازی صاحب کی طرف سے اب تک غداری کا مقدمہ درج ہوچکا ہوتا۔انہوں نے کہاکہ وزیراعظم عمران خان ہی وزیر صحت بھی ہیں، اربوں روپے کے سکینڈل کا جواب دیں۔اربوں روپے کی ادویات کا سکینڈل پہلے بھی آچکا ہے، ملوث وزیر کو عمران خان نے تحفظ اور نیا عہدہ دیا۔شہباز شریف نے کہاکہ وزیراعظم کی حیرانگی سے کام نہیں چلے گا، قوم کو لوٹنے والے مجرموں کو کٹہرے میں لایاجائے۔جان بچانے والی ادویات پر ڈاکہ ڈالا گیا ہے، لوگوں کی زندگیوں کے ساتھ کھیلا گیا
