فوج سیلاب متاثرین کی ہر ممکن مدد جاری رکھے گی، کور کمانڈر بلوچستان

کوئٹہ (انتخاب نیوز) کور کمانڈر بلوچستان آصف غفور نے کہا ہے کہ سیلاب سے متاثرہ عوام کو فوج کسی بھی صورت تنہا نہیں چھوڑیں گی، مشکل کی اس گھڑی میں عوام انتظامیہ کو ہمیشہ درمیان پائیں گے۔ ان خیالات کا اظہار کمانڈر 12 کور لیفٹیننٹ جنرل آصف غفور نے گزشتہ شب کوئٹہ کے مختلف علاقوں میں سیلاب کی صورتحال اور امدادی سرگرمیوں کا جائزہ لینے کے لئے ہزارہ ٹاؤن کا دورہ کیا۔ اس موقع پرآئی جی ایف سی نارتھ میجر جنرل امیر اجمل، کمشنر کوئٹہ سہیل الرحمن بلوچ، ڈی جی پی ڈی ایم اے نصیر ناصر، ڈپٹی کمشنر کوئٹہ شہک بلوچ،ہزارہ ڈیموکریٹک پارٹی کے رکن اسمبلی وسیکرٹری اطلاعات قادر نائل، رکن مرکزی کونسل داؤد چنگیزی اور ہزارہ برداری کے دیگر معززین بھی موجود تھے۔ کور کمانڈر بلوچستان آصف غفور نے ہزارہ ٹاؤن کے مختلف علاقوں میں سیلاب کی صورتحال اور امدادی سرگرمیوں کا جائزہ لیا اور لوگوں میں گھل مل گئے۔ انہوں نے علاقے کے درپیش مسائل اور حالیہ سیلاب سے ہونے والے نقصانات کے متعلق آگاہی حاصل کی اور ہر ممکن امداد کی یقین دہانی کرائی۔ اس موقع پر انہوں نے علاقہ مکینوں سے کہا کہ سیلاب سے متاثرہ عوام کو فوج کسی صورت تنہا نہیں چھوڑے گی اور مشکل کی اس گھڑی میں عوام انتظامیہ کو ہمیشہ اپنے درمیان پائے گی۔ کور کمانڈر لیفٹیننٹ جنرل آصف غفور نے اس عزم کا اعادہ کیا کہ فوج سیلاب متاثرین کی ہر ممکن مدد جاری رکھے گی۔