بلاول کا مختلف ممالک کے 20سے زائد سفارتکاروں کے ہمراہ سیلاب زدہ علاقوں کا فضائی دورہ
اسلام آباد (انتخاب نیوز) وزیر خارجہ بلاول بھٹو زرداری کے ہمراہ 20سے زائد مختلف ممالک کے سفارت کاروں اور عالمی اداروں کے نمائندگان نے سیلاب سے متاثرہ علاقوں کا فضائی دورہ کیا، اس موقع پر سکھر ایئرپورٹ پر این ڈی ایم اے نے سفارتکاروں اور نمائندگان کو سیلاب سے ہونیوالی تباہی کے حوالے سے بریفنگ دی۔تفصیلات کے مطابق وزیرخارجہ بلاول بھٹو زرداری کے ہمراہ امریکا، چین، فرانس، جاپان، اٹلی، جنوبی کوریا، قطر، ترکیہ،ترکمانستان، بحرین، سعودی عرب، آذر بائیجان، جرمنی اور سپین سمیت 20 سے زائد ممالک کے سفارتکاروں اور عالمی اداروں کے نمائندگان نے سیلاب سے متاثرہ علاقوں کا فضائی دورہ کیا۔ وفاقی وزیر خورشید شاہ اور وزیراعلی سندھ نے سکھر ائیرپورٹ پر وزیرخارجہ بلاول بھٹو زرداری، وفاقی وزیر برائے منصوبہ بندی اور سفارت کاروں کا استقبال کیا۔سفارت کاروں اور عالمی اداروں کے نمائندگان کو سکھر ائیرپورٹ پراین ڈی ایم اے نے سیلاب سے ہونے والی تباہی کے حوالے سے بریفنگ دی۔وزیر خارجہ بلاول بھٹو زرداری نے مختلف ممالک کے سفارت کاروں اور عالمی اداروں کے نمائندگان کو پاکستان میں ہونے والے نقصانات سے آگاہ کیا۔
