گوادر فری زون میں ٹریڈنگ سینٹر کا مرکزی ڈھانچہ کامیابی کے ساتھ مکمل

گوادر (انتخاب نیوز) گوادر فری زون میں سدرن چائنا کموڈٹی ایگزیبیشن اینڈ ٹریڈنگ سینٹر کے مرکزی ڈھانچے کو حال ہی میں کامیابی کے ساتھ مکمل کر لیا گیا۔ منصوبے کی تعمیر کرنے والی سی سی سی سی، ایف ایچ ڈی آئی انجینئرنگ کمپنی لمیٹڈ نے کہا ہے کہ یہ پیشرفت اس بات کا ثبوت ہے کہ بنیادی ڈھانچہ 2023ءکے اوائل تک فعال ہو جائے گا اور شاندار کاروباری نمائشوں کی میزبانی کرے گا۔ یہ منصوبہ تقریباً 2000 مربع میٹر رقبے پر محیط ہے۔ یہ سینٹر ایک نمائشی ہال، بزنس ایریا، میٹنگ رومز، سپورٹس ایریا، آفس، ڈارمیٹری وغیرہ پر مشتمل ہے۔ تکمیل کے بعد یہ اندرون و بیرون ملک سے آنے والوں کے لیے پاکستانی اور چینی اشیاءکی نمائش کرے گا۔ کنسٹرکٹر کے مطابق پہلی منزل سامان کی نمائش کے لیے بنائی گئی ہے اور ضرورت پڑنے پر اسے کانفرنس سینٹر کے طور پر استعمال کیا جاسکتا ہے جس میں 500 افراد کے بیٹھنے کی توقع ہے۔ اس کے علاوہ اسے بڑے پیمانے پر ثقافتی اور کھیلوں کی سرگرمیوں کی میزبانی کے لیے کھیلوں کے مقامات کے طور پر استعمال کیا جا سکتا ہے، جیسے باسکٹ بال کے میچ، بیڈمنٹن کے میچز اور دیگر تقریبات۔ سی سی سی سی، ایف ایچ ڈی آئی انجینئرنگ کمپنی لمیٹڈ نے کہا ہے کہ ہم سخت محنت کریں گے اور پروجیکٹ کو گوادر میں نمائش اور فروخت، تجارت اور لاجسٹک کے لیے ایک مرکز بنانے کی مسلسل کوششیں کریں گے۔