فوج اور عوام کے درمیان محبت اور اعتماد کا مضبوط تعلق قائم ہے،میرعبدالقدوس بزنجو

کوئٹہ(این این آئی) وزیراعلیٰ بلوچستان میر عبدالقدوس بزنجو نے کہا ہے کہ فوج اور عوام کے درمیان محبت احترام اور اعتماد کا مضبوط تعلق قائم ہے قوم کو اپنی بہادر افواج اور شہداء پر فخر ہے۔جمعرات کوملک کی موجودہ صورتحال کے حوالے سے وزیراعلیٰ نے اپنے ایک بیان میں کہا کہ 22 کروڑ عوام اپنی افواج کی قربانیوں کی دل سے قدر کرتے ہیں پاک فوج وطن عزیز کی جغرافیائی اور نظریاتی سرحدوں کے تحفظ کی ضامن ہے۔انہوں نے کہا کہ اداروں پر تنقید اور حقائق کے منافی الزامات قابل مذمت ہیں پاک فوج اور قوم کے درمیان تعلق کو دنیا کی کوئی طاقت ختم نہیں کر سکتی اس وقت قومی یکجہتی اور باہمی اتحاد و اتفاق کی اشد ضرورت ہے۔وزیراعلیٰ نے کہا کہ قوم میں اداروں کے خلاف بد اعتمادی اور نفاق پیدا کرنے کی کوشش سے ملک کو نقصان پہنچے گاپوری قوم بشمول بلوچستان کے عوام اپنی بہادر افواج کے ساتھ ثابت قدمی سے کھڑے ہیں۔