شوبز کے اکثر لوگ فراڈ اور زیادہ تر چیزیں محض فریب ہیں، اشنا شاہ

لاہور(مانیٹرنگ ڈیسک)اداکارہ اور ماڈل اشنا شاہ نے کہا ہے کہ کیا میں انڈسٹری کا راز بتاؤں، جہاں اکثر لوگ فراڈ اور زیادہ تر چیزیں محض نظر کا دھوکا ہیں تاہم اشنا شاہ نے یہ وضاحت نہیں کی کہ یہ بات کس تناظر میں کی گئی۔ اپنی حالیہ ٹوئٹ میں اشنا شاہ نے نیا پینڈورا باکس کھول دیا ہے۔ اداکارہ نے لکھا کہ کیا میں آپ کو انڈسٹری کا راز بتا سکتی ہوں؟ اس میں زیادہ تر لوگ فراڈ ہیں۔ زیادہ تر چیزیں وہم ہیں، ایسا ہمیشہ تو نہیں لیکن اکثر ہوتا ہے کہ جب کسی چیز کو خوب بڑھا چڑھا کر پیش کیا جاتا ہے تو اسے اپنے فائدے کے لیے کم صلاحیت والے سراہتے ہیں۔ یہ دھواں اور آئینہ کی طرح ہے۔ یہ پبلک ریلیشن ہے، اس طرح پوری حکمت عملی کے ساتھ ایک بیانیہ ترتیب دیا جاتا ہے جس کی ہجوم پیروی کرتا ہے۔خوبرو اداکارہ نے اپنی بات جاری رکھتے ہوئے دوسری ٹوئٹ میں مزید لکھا کہ ایسا صرف شوبز انڈسٹری میں نہیں بلکہ اس کا اطلاق پورے معاشرے پر ہوتا ہے۔ دھوکہ دہی صرف ایک چیز نہیں تقریباً سب ہی کچھ ہے اور یہ شو بزنس دنیا میں ہر جگہ پھیل چکی ہے۔ چاہے وہ فلمیں ہوں، ٹی وی، فلاحی کام ہوں یا کھیل۔ دھوکہ دہی اور صداقت کا تناسب افسوسناک اور قدرے مایوس کن ہے۔