ملکی سیاسی منظر نامے میں باپ بارٹی کی اہمیت زیادہ بڑھ گئی ہے،میر عبدالقدوس بزنجو
کوئٹہ: بلوچستان عوامی پارٹی کے مرکزی صدر و وزیراعلیٰ بلوچستان میر عبدالقدوس بزنجو سے پارٹی کے سینئر رہنماؤں سابق پولیٹیکل سیکرٹری وزیراعلیٰ بلوچستان و وائس چیئرمین آئین ساز کمیٹی سید محمد اسلم شاہ اور چیئرمین آئین ساز کمیٹی (باپ) شاہ زمان خان غلزئی نے اہم ملکی سیاسی اور پارٹی امور پر ملاقات کی۔ اس موقع پر وزیراعلیٰ بلوچستان نے کہاکہ ملکی سیاسی منظر نامے میں بلوچستان عوامی پارٹی کی اہمیت زیادہ بڑھ گئی ہے اور باپ پارٹی نے ملکی مفاد میں مثبت اور بہتر کردار ادا کرنا ہے۔ اس موقع پر انہوں نے کہاکہ پارٹی کو ملک کے دیگر صوبوں میں منظم کرنے کے لئے تنظیمی کمیٹیاں تشکیل دی جائیں گی۔ آئندہ انتخابات کیلئے ہماری تیاری شروع ہوچکی ہے اور موجودہ عوامی حکومت عوام کے مسائل سے بخوبی آگاہ ہے اور عوامی خدمات کے صلے میں آئندہ بھی اکثریت سے جیت کر دوبارہ عوام کی امنگوں کے مطابق حکومت کریں گے۔ اس موقع پر سید محمد اسلم شاہ اور شاہ زمان خان غلزئی نے پارٹی کیلئے ہر محاذ پر خدمات سر انجام دینے پر وزیراعلیٰ کا شکریہ ادا کیا۔
