بھٹو کرشمہ ساز لیڈر تھے، خود غرض افراد نے ناجائز اقتدار کے خاطر پاکستان کو تختہ مشق بنایا، آصف زرداری

اسلام آباد (انتخاب نیوز) سابق صدر اور پیپلزپارٹی پارلیمنٹیرینز کے چیئرمین آصف علی زرداری نے پیپلز پارٹی کے بانی چیئرمین ذوالفقار علی بھٹو کے یوم ولادت پر دنیا بھر میں آباد ان کے جیالوں اور حامیوں کو مبارکباد پیش کرتے ہوئے کہا 43 سال قبل عدالتی قتل کے بعد بھی عوام کے دل پر حکمرانی کررہے ہیں، ان کے مزار پر کروڑوں انسان اپنے عقیدے کے مطابق دعاؤں کے تحفے ان کے نام کرتے ہیں جبکہ ذوالفقار علی بھٹو کے قاتلوں اور قتل کی سازش میں شریک کرداروں کی قبریں ویران ہیں۔ آصف علی زرداری نے کہا کہ ذوالفقار علی بھٹو مدتوں سے استحصال کے شکار انسانوں کیلئے قدرت کا ایک عظیم تحفہ تھے، جس کی ہر قدم پر تاریخ نے رہنمائی کی۔ انہوں نے کہا کہ بھٹو کرشمہ ساز لیڈر تھے۔ انہوں نے تین سال کی مختصر مدت میں عوامی شعور کی ایسی شمع روشن کی جس کی وجہ سے عوام کا استحصال کرنے والے طبقات کے قلعے زمین بوس ہوگئے۔ ذوالفقار علی بھٹو نے عوام کو سوچنے کیلئے شعور، بولنے کیلئے زبان اور عزت سے سر اٹھا کر جینے کا سلیقہ سکھایا تھا۔ آصف علی زرداری نے کہا کہ بھٹو نے مسلم دنیا کی بھی رہنمائی کی وہ فلسطین کے مسلمانوں کی آزادی کی جدوجہد کے بھی روح رواں تھے۔ بھٹو انسانی آزادی کے بہت بڑے حامی، طرفدار اور وکیل تھے۔ آصف زرداری نے کہا کہ بھٹو دنیا کے ایسے لیڈر تھے جو مذاکرات کی میز پر ناقابل شکست تھے جس کی وجہ سے دنیا کے مہذب طبقات ان کے مداح تھے۔ سابق صدر نے کہا کہ بھٹو نے پانچ سال کی مختصر مدت میں نہ صرف 1971 ء کی جنگ میں ہونے والی تباہی کے سارے نشانات مٹا کر ایک نئے پاکستان کی تعمیر کی۔ آصف علی زرداری نے کہا کہ بھٹو نے پاکستان کی ایٹمی صلاحیت کیلئے دنیا کے طاقتور قوتوں سے ٹکر لی وہ ایسے پاکستان کی تعمیر چاہتے تھے کہ کوئی دشمن پاکستان کو بری نظر سے نہ دیکھے بلکہ وہ حقیقی معنوں میں پاکستان کو ایسی ایٹمی قوت بنایا چاہتے تھے جہاں جدید سائنسی بنیادوں پر میڈیکل اور انجینئرنگ کی صلاحیت ہو، انرجی میں ملک خود کفیل ہو اور زراعت میں ایسی ترقی کرے کہ پاکستان خوراک کی پیداوار میں ترقی یافتہ ممالک سے آگے ہو۔ آصف علی زرداری نے کہا کہ ذوالفقار علی بھٹو نے ہر پاکستانی کو پاسپورٹ بنوانے کا حق دیا تاکہ وہ دنیا بھر میں آباد ہوکر اپنے ملک کا نام روشن کریں۔ سابق صدر آصف علی زرداری نے کہا کہ جب پاکستان بے مثال ترقی کی منزلیں طے کرنے تو اقتدار کے لالچی ٹولے نے انتہائی حقیر مقاصد کی خاطر اپنے ملک پر قبضہ کرلیا۔ کچھ خود غرض افراد نے ناجائز اقتدار کے خاطر پاکستان کو تختہ مشق بنا دیا، آج کے دن ہم اس عہد کی تجدید کرتے ہیں کہ پاکستان کو ایک بار پھر ایسا باوقار ملک بنائیں گے جس کیلئے بینظیر بھٹو نے زندگی بھر جدوجہد کی تھی۔