دنیا بھر کی طرح پاکستان میں بھی ارتھ آور منایا گیا، ایک گھنٹے کیلئے بتیاں بند کردی گئیں

لاہور ( این این آئی) زمین کے ماحول کے تحفظ کے لیے دنیا بھر میں ہفتہ کے روز ارتھ آور منایا گیا ۔اقوام متحدہ کے سیکرٹری جنرل انتونیو گوٹیریس نے لوگوں سے ہفتہ کے روز رات 8بجے ایک گھنٹے کے لیے لائٹس بند کرنے کی اپیل کی ۔انتونیو گوٹیریس نے کہا کہ ارتھ آور بڑے پیمانے پر کلائیمٹ ایکشن کو بڑھانے کی کال ہے، ہم سب اس میں اپنا کردار ادا کرسکتے ہیں۔انہوں نے لوگوں سے اپیل کی ہے کہ آپ جہاں بھی ہیں اپنے مقامی وقت کے مطابق رات8بجے ایک گھنٹے کے لیے لائٹیں بند کریں۔ پاکستان میں بھی ارتھ آور کے موقع پر ایک گھنٹے بتیاں بند کی گئیں۔ واضح رہے کہ ہر سال دنیا بھر میں رات 8بجے ایک گھنٹے کے لیے لائٹیں بند کر کے ارتھ آور بنایا جاتا ہے۔