اسرائیلی زندانوں میں قید 14 فیصد فلسطینی بیمار،19کینسر کے مریض
غزہ (صباح نیوز)فلسطین سینٹر فار پریزنر اسٹڈیز کا کہنا ہے کہ قابض اسرائیل کی جیلوں میں 650 سے زائد قیدی مختلف بیماریوں میں مبتلا ہیں اور وہ قیدیوں کی کل تعداد کا 14 فیصد ہیں۔ اسرائیلی زندانوں میں قید کل فلسطینیوں کی تعداد 4,800 ہے، جن میں 19 قیدی کینسر جیسے موذی مرض کا شکار ہیں۔مرکز اطلاعات فلسطین نے رپورٹ میں کہا کہ ریاست تمام بین الاقوامی معاہدوں کو نظر انداز کرتی ہے جن میں قیدیوں کے طبی معائنے کی ضرورت کو ان کی ابتدا میں بیماریوں کا پتہ لگانے اور ہر قیدی کو فطرت کے مطابق ضروری طبی دیکھ بھال فراہم کرنے کی شرط رکھی گئی۔ قابض ریاست کی جیلوں میں 650 سے زائد بیمار قیدی ہیں جن میں 160 قیدی سنگین نوعیت کی بیماریوں کا شکار ہیں ، جن میں کینسر، گردے کی خرابی، دل کی بیماری، پٹھوں کی خرابی، بند شریانیں، ذیابیطس، بلڈ پریشر اور دیگر شامل ہیں۔ ایسی بیماریاں جو طبی غفلت کے جرم کے نتیجے میں قابض ریاست کی جیلوں میں درجنوں قیدیوں کی موت کا باعث بنیں۔ رپورٹ میں طبی غفلت اور دیگر وجوہات کی بنا پر گذشتہ تین سال کے دوران سنگین بیماریوں خصوصا کینسر میں مبتلا قیدیوں کی تعداد میں اضافے کی نشاندہی کی گئی ۔ ان میں سے آخری قیدی "ولید دقہ” جسے 38 سال تک حراست میں رکھا گیا تھا کے بارے میں پتا چلا کہ اسے کینسر تھا۔
