شریف شہریوں پر پولیس کا تشدد غنڈہ گردی ہے، عوام کی تذلیل بند کی جائے، کوئٹہ بار ایسوسی ایشن

کوئٹہ (انتخاب نیوز) کوئٹہ بار ایسوسی ایشن کے صدر ملک عابد کاکڑ ایڈووکیٹ، جنرل سیکرٹری چنگیز حئی بلوچ ایڈووکیٹ نے پولیس اور واپڈا کی غنڈہ گردی کی شدید الفاظ میں مذمت کرتے ہوئے کہا کہ اس طرح عوام کی تذلیل بند کی جائے، اگر کوئی بجلی چوری میں ملوث ہے تو اس کی بجلی کا کنکشن منقطع کیا جائے نہ کہ اس طرح عوام کی تذلیل کی جائے۔ حکمرانوں نے ملک کو آئی ایم ایف کے پاس گروی رکھ دیا ہے، آئی ایم ایف کا بوجھ غریب عوام پر ڈال کر مسائل حل نہیں ہونگے، حکمران طبقے کی شاہی خرچیوں کا بوجھ عوام پر ڈلا جارہا ہے، جو غریب عوام کے ساتھ ظلم کے مترادف ہے۔ عوام پر بجلی، گیس کا بوجھ ڈالنے کے بجائے حکمران طبقے کی فری بجلی، گیس، پیٹرول ختم کرکے عوام کو ریلیف دیا جائے۔ بلوچستان کے غریب عوام کی تذلیل نہ روکی گئی تو بھرپور احتجاج کیا جائے گا۔ کوئی قانون پولیس کو اجازت نہیں دیتا کہ وہ اس طرح غریب عوام پر تشدد کرے۔ سارا زور صرف غریب عوام پر ہے، غریب عوام دو وقت کی روٹی کیلئے پریشان ہیں، یہاں 40 سے 50 ہزار جرمانہ کیا جاتا ہے، واپڈا اہلکار خود چوری کرانے میں ملوث ہوتے ہیں، پورے بلوچستان میں واپڈا اہلکار ماہانہ رشوت لے کر چوری کی اجازت دیتے ہیں۔ کوئٹہ میں پولیس والوں کی نہتے آدمی پر بے رحمی سے کلاشنکوف اور مکے تھپڑوں کی برسات کرنا ظلم ہے۔