غزہ میں 18 ہزار شہادتیں، بائیڈن کا اسرائیل کی حمایت جاری رکھنے کا عزم

واشنگٹن(صباح نیوز) غزہ میں اسرائیل کی جارحیت جاری ہے اور مجموعی طور پر اب تک 18 ہزار نہتے فلسطینی شہید ہوچکے ہیں ، ایسے میں امریکی صدر جو بائیڈن نے اسرائیل کی حمایت جاری رکھنے کے عزم کا اعادہ کیا ہے ۔ وائٹ ہاؤس میں تقریب میں امریکی صدر جوبائیڈن نے کہا کہ حماس کو ختم کرنے تک اسرائیل کی فوجی امداد جاری رکھیں گے۔انہوں نے کہا کہ اس بات کا خیال رکھنا ہوگا عالمی رائے عامہ ایک ہی رات میں تبدیل ہوسکتی ہے ، اس دوران امریکی صدر نے اسرائیلی وزیراعظم نیتن یاہو سے اپنے مضبوط تعلق کا بھی اشارہ دیا۔دوسری جانب امریکی محکمہ خارجہ کے ترجمان میتھیو ملر نے کہا ہے کہ غزہ میں حماس کی قیادت کو زندہ چھوڑنے والی جنگ بندی ناقابل قبول ہوگی، غزہ جنگ کا واحد حل عسکری حل ہے۔انہوں نے کہا ہم سمجھتے ہیں کہ حماس کی قیادت کو ختم کرنے کا صرف فوجی حل ہوسکتا ہے جس نے 7 اکتوبر کے حملوں کی منصوبہ بندی کی تھی، بلآخر اسرائیلیوں اور فلسطینیوں کے درمیان وسیع تر تنازع کو فوجی طریقے سے حل نہیں کیا جا سکتا۔خیال رہے کہ ایک روز قبل امریکی صدر بائیڈن نے فلسطینیوں کی نسل کشی کیلئے اسرائیل کومزید گولہ بارودفروخت کی منظوری دی تھی ۔امریکی صدر جو بائیڈن نے اپنے ہنگامی اختیارات استعمال کرتے ہوئے کانگریس کے جائزے کے بغیر ہی اسرائیل کو مزید 14 ہزار ٹینک کے گولے فروخت کرنے کا فرمان جاری کیا۔واضح رہے کہ غزہ کی وزارت صحت نے اسرائیل کی وحشیانہ کارروائیوں کے نتیجے میں مجموعی طور پر 18ہزار 200 سے زائد شہادتوں کی تصدیق کی ہے۔ وزارت صحت کے مطابق اسرائیلی حملوں کے نتیجے میں اب تک 49 ہزار سے زائد فلسطینی زخمی ہیں۔