امریکا میں مندرکی دیواروں پر مودی مخالف اور خالصتان کے حق میں نعرے تحریر

کیلیفورنیا (صباح نیوز) امریکی ریاست کیلیفورنیا میں ایک مندرکی دیواروں پر مودی مخالف اور خالصتان تحریک کے حق میں نعرے لکھ دئیے گئے۔غیر ملکی میڈیا کے مطابق یہ واقعہ کیلیفورنیا کے شہر نیو یارک میں قائم سوامی نارائن مندر وسانا سنستھا میں پیش آیا جس کی دیواروں پر ہندوں سے نفرت پر مبنی اور بھارتی وزیر اعظم نریندر مودی کے خلاف نعرے لکھے گئے۔اس حوالے سے ہندو امریکن فانڈیشن کی جانب سے مائیکرو بلاگنگ ویب سائٹ ایکس پر مندر پر لکھے نعروں کی تصاویر بھی جاری کی گئی ہیں۔فانڈیشن کی جانب سے کہا گیا ہے کہ یہ نفرت انگیز نعرے مندر میں آنے والوں کو خوف میں مبتلا کرنے کیلئے لکھے گئے ہیں اور ساتھ ہی یہ تشدد کے خوف کو بھی بڑھاوا دے رہے ہیں۔ادھر مندر کی انتظامیہ کی جانب سے بتایا گیا ہے کہ مندر کے قریب رہنے والے ایک ہندو شخص نے مندر پر لکھے نعروں کو دیکھ کر انتظامیہ کو آگاہ کیا۔اس حوالے سے نیو یارک پولیس ڈیپارٹمنٹ اور ڈیپارٹمنٹ آف جسٹس سول رائٹس ڈیویژن میں واقعے کا مقدمہ درج کیا گیا ہے اور پولیس معاملے کی تحقیقات کر رہی ہے۔دوسری جانب حکومت مخالف نعروں پر بھارت نے برہمی کا اظہار کرتے ہوئے امریکا سے تحقیقات کامطالبہ کیا ہے اور ساتھ ہی بھارتی وزیر خارجہ نے کہا کہ سان فرانسسکو قونصل خانے نے امریکی حکام کو شکایت درج کرا دی ہے۔واضح رہے کینیڈا میں خالصتان تحریک کے رہنماؤں کے قتل میں ہندوں کے شامل ہونے کا انکشاف ہوا تھا جبکہ امریکا میں بھی سکھ رہنما کے قتل کی سازش کو ناکام بنا دیا گیا تھا جس کے بعد سے بھارت کے کینیڈا اور امریکا کے ساتھ تعلقات میں گرما گرمی دیکھنے میں آ رہی ہے۔