مکہ مکرمہ اور مدینہ منورہ میں 330 ہوٹل، گیسٹ ہائوسز بند
مکہ مکرمہ (صباح نیوز)سعودی عرب کی حکومت نے مکہ مکرمہ اور مدینہ منورہ میں 330 ہوٹل، گیسٹ ہائوسزاور فرنشڈ اپارٹمنٹ بند کردیئے۔ یہ ہوٹل اور ا پارٹمنٹ معمول کے چیک اپ کے دوران بے قاعدگیاں کا پتہ چلنے پر بند کئے گئے ۔سیاحت اور میزبانی کی وزارت نے یہ جانچ پڑتال ہمارے مہمان ہماری اولین ترجیح ہیں کے موٹو کے تحت کی۔مکہ مکرمہ میں جانچ پڑتال کے دوران 2 ہزار سے زائد بے قاعدگیاں پائی گئیں۔ اس بنیاد پر 280 عمارتیں بند کردی گئیں۔ ان عمارتوں کے مالکان نے کاروبار شروع کرنے سے قبل متعلقہ لائسنس حاصل نہیں کیا تھا۔مدینہ منورہ میں جانچ پڑتال کے دوران 1200 سے زائد بے قاعدگیاں پائی گئیں۔ متعلقہ لائسنس حاصل نہ کئے جانے پر 50 عمارتیں بند کردی گئیں۔متعلقہ وزارت نے سیاحتی خدمات فراہم کرنے والے اداروں سے کہا ہے کہ سیاحوں کو زیادہ سے زیادہ سہولتوں کی فراہمی یقینی بنائیں۔سیاحت کی وزارت ملک بھر میں جانچ پڑتال کے ذریعے سیاحوں کے لئے زیادہ سے زیادہ معیاری خدمات کی فراہمی یقینی بنانے کی کوشش کر رہی ہے۔
