فلسطینی ریاست کے قیام پر نیتن یاہو نے امریکی صدرسے کوئی وعدہ نہیں کیا، اسرائیل
مقبوضہ بیت المقدس(صباح نیوز) امریکی صدر جوبائیڈن سے ٹیلی فونک گفتگو میں فلسطینی ریاست کے قیام کی حامی بھر کر اسرائیلی وزیراعظم نیتن یاہو اپنے وعدے سے مکر گئے۔عالمی خبر رساں ادارے کے مطابق اسرائیلی وزیر اعظم بنجمن نیتن یاہو کے دفتر سے جاری بیان میں کہا گیا ہے کہ فلسطینی ریاست کے قیام پر وزیراعظم نیتن یاہو نے امریکی صدرسے کوئی وعدہ نہیں کیا۔بیان میں فلسطینی ریاست کے قیام کے لیے رضامندی کے اظہار کی تردید کرتے ہوئے کہا گیا ہے کہ وزیراعظم نیتن یاہو غزہ سے متعلق امریکی صدر سے گفتگو میں فلسطینی ریاست کے قیام کی مخالفت کے اپنے برسوں پرانے موقف پر قائم رہے۔اسرائیلی براڈکاسٹنگ کارپوریشن کے مطابق وزیراعظم نیتن یاہو اور امریکی صدر جوبائیڈن کے درمیان ٹیلی فون پر غزہ جنگ کی صورت حال کے حالے سے 40منٹ تک بات چیت ہوئی تھی جو کہ مثبت رہی۔ دونوں رہنماو¿ں نے گفتگو کے دوران غزہ میں جنگ کی کی تازہ ترین پیش رفت، جنگ کے خاتمے کے طریقہ کار اور اس کے بعد کے ممکنہ مسائل پر تبادلہ خیال کیا۔ یاد رہے کہ امریکی صدر جو بائیڈن نے صحافیوں کو بتایا تھا کہ ایک روز قبل اسرائیلی وزیراعظم نے ٹیلی فونک گفتگو میں آزادی فلسطینی ریاست کے قیام پر رضامندی ظاہر کی تھی۔
