امریکی ٹیلی کام کمپنی کے کروڑوں صارفین کا ذاتی ڈیٹا ڈارک ویب پر سامنے آگیا
نیویارک (مانیٹرنگ ڈیسک) امریکی ٹیلی کام کمپنی اے ٹی اینڈ ٹی کے 7 کروڑ سے زائد صارفین کا ذاتی ڈیٹا انٹرنیٹ پر لیک ہوگیا۔غیر ملکی میڈیا کے مطابق لیک ہونے والی معلومات میں صارفین کا سوشل سکیورٹی نمبر، پاس کوڈز، فون نمبر اور پتے شامل ہیں۔ کمپنی نے اپنے بیان میں کہا ہے کہ حال ہی میں ڈارک ویب پر سامنے آنے والے ایک ڈیٹا سیٹ میں اے ٹی اینڈ ٹی کے 76 لاکھ موجودہ صارفین اور 6 کروڑ 54 لاکھ پرانے صارفین کی معلومات شامل ہیں۔کمپنی کا کہنا ہے کہ اب تک کی معلومات کے مطابق چوری شدہ ڈیٹا 2019ءیا اس سے قبل کا ہے اور اس میں صارفین کی مالی معلومات اور کالز کی تفصیلات شامل نہیں ہیں۔ امریکی کمپنی کے مطابق اب تک ڈیٹا چوری ہونے کے کوئی شواہد سامنے نہیں آئے ہیں، سائبر سیکورٹی کے ماہرین کو معاملے کی تحقیقات کے لیے طلب کرلیا گیا ہے۔ کمپنی کے ترجمان نے اپیل کی ہے کہ صارفین اپنے اکاو¿نٹ کی سرگرمیوں کی سخت نگرانی کریں۔
