فاروق بلوچ تاحال لاپتہ ہے، جلد بازیاب کرایا جائے، لواحقین کا مطالبہ

کوئٹہ (مانیٹرنگ ڈیسک) ضلع کیچ کے علاقہ تجابان کے رہائشی طالبعلم 16 سالہ فاروق ولد سخی 28مئی2024 سے تاحال لاپتہ ہے۔ فیملی کے مطابق لاپتہ فاروق سخی نے حال ہی میں اپنے میٹرک کے امتحانات دے کر کوئٹہ میں تیاری کیلئے آئے ہوے تھے۔ گزشتہ روز 28 مئی 2024 میں فاروق بلوچ کو رات کے 2 بجے اپنے 6 ساتھیوں سمیت عارف پلازہ ای ون سٹی بروری روڈ کوئٹہ سے جبری طور پر لاپتہ کردیا تھا ۔چار روز گزرنے کے بعد 5 ساتھی بازیاب ہوگئے تھے۔ مگر فاروق اب بھی لاپتہ ہے۔ انہوں نے مزید کہا کہ جب بروری روڈ میں ایف آئی آر درج کرنے گئے تو پولیس نے ایف آئی آر درج کرنے سے انکار کیا تو مجبوراً بروری روڈ احتجاجً بند کردیا۔ بعد میں ہم نے دو دن کا وقت دیا مگر پھر بھی تاحال ایف آئی آر درج نہیں کیا گیاہے۔ جس کے بعد مجبورا 3 جون کوہم نے ڈی سی آفس کے سامنے احتجاجی کیمپ لگایا مگر اب بھی نہ ہی ہماری ایف آئی آر لی گئی ہے اور نہ ہی فاروق بلوچ کا کوئی بھی معلومات ہمیں دیا گیا ہے۔ فیملی نے مزید کہا ہے کہ لوگ عید کی تیاریوں میں مصروف ہیں اور کبھی پولیس تھانہ کبھی سڑکوں پر دھرنا دینے پرمجبور ہیں ان تمام صورتحال میں فیملی اذیت میں مبتلا ہے۔ فیملی نے عاجزانہ طورپر حکومت اورمتعلقہ حکام سے اپیل کی ہے کہ اگر انہوں نے کوئی جرم کیا ہے عدالت میں پیش کیا جائے اس طرح غائب کرکے ہمیں ذہنی اذیت میں مبتلا نہ کیا جائے۔