مچھ جیل کی بجلی بحال نہ ہوسکی، سیکورٹی خدشات بڑھ گئے، قیدیوں کے فرار کا خطرہ

کوئٹہ (یو این اے) بلوچستان کے مچھ جیل میں 24گھنٹے بعد بھی بجلی بحال نہ ہوسکی۔ سپرنٹنڈنٹ جیل نے ایڈ یشنل چیف سیکرٹری داخلہ کو مراسلہ ارسال کردیا جس میں کہا گیا ہے کہ مچھ جیل کی بجلی کاٹنے سے سیکورٹی خدشات بڑھ گئے ہیں۔ انہوں نے کہا کہ شدید گرمی میں قیدیوں کو ہیٹ اسٹروک کا خطرہ ہے۔ سپرنٹنڈنٹ مچھ جیل نے کہاہے کہ الیکڑونکس تندور کی بندش سے 750 قیدیوں کی روٹی بنانے میں مشکلات کا سامنا ہے۔ انہوں نے مزید کہا کہ بجلی نہ ہونے سے رات کو جیل کے سی سی ٹی وی کیمرے کام نہیں کررہے ہیں اور 21 اپریل 2005 کو 9 قیدی بجلی کی بندش کے باعث فرار ہوگئے تھے۔ خیال رہے کہ گزشتہ روز واجبات کی عدم ادائیگی پر بلوچستان کی سب سے بڑی جیل سینٹرل جیل مچھ کی بجلی کاٹ دی گئی تھی۔