ٹریفک پولیس اہلکار پر تشدد کا معاملہ، ملزم کیخلاف مقدمہ درج، گرفتاری کیلئے پولیس کے چھاپے

کوئٹہ(یو این اے )کوئٹہ میں سرعام ٹریفک پولیس اہلکار کو تشدد کا نشانہ بنانے والے بااثر شخص دانش لہڑی کے کیخلاف مقدمہ درج ہوگیا، ملزم کی گرفتاری کے لیے پولیس کے چھاپے۔دو روز قبل سریاب تھانے کی حدود میں رکن بلوچستان اسمبلی کے بھتیجے دانش لہڑی کی جانب سے پولیس اہلکار پر سرعام تشدد کے خلاف پولیس اہلکار بابرعلی کی درخواست پر مقدمہ درج کرلیا گیا ہے۔ملزم دانش لہڑی ایم پی اے لیاقت لہڑی کا بھتیجا اور معروف ٹرانسپورٹر حکمت لہڑی کا بیٹا ہے، ملزم نے دو روز قبل ارباب کرم خان روڈ پر ٹریفک پولیس کانسٹیبل بابر علی کو تشدد کا نشانہ بنایا تھا جبکہ اس مارپیٹ کی وڈیو بھی وائرل ہوگئی۔ ملزم کے خلاف درج ایف آئی آر میں337A , 504 ت پ اور تعزیرات پاکستان کی 506 B کی دفعات شامل ہیں۔ تشدد کا نشانہ بننے والے ٹریفک کانسٹیبل بابر علی کے مطابق ارباب کرم خان روڈ پر ملزم دانش لہڑی نے مارا پیٹا اور تشدد کیا۔ بابر علی کے مطابق وہ ڈیوٹی سے واپسی پر گھر جاتے ہوئے موبائل فون پر بات کرنے کے لیے روڈ کنارے رکا تو سرکاری گاڑی پیچھے سے آئی اور مجھے ہارن دینے شروع کیے، ہارن دینے پر ملزم کو بتایا کہ آپ کا راستہ خالی ہے ہارن کیوں دے رہے ہو۔کانسٹیبل بابر علی کے مطابق میرے جواب دینے پر ملزم دانش لہڑی نے گاڑی سے اتر کر مجھ پر تشدد شروع کردیا۔ ملزم نے زدکوب کرنے کیساتھ ساتھ جان سے مارنے کی دھمکیاں بھی دیں۔ٹریفک پولیس کانسٹیبل بابر علی کے مطابق موقع پر موجود شہریوں نے اسے چھڑایا تو ملزم گالیاں دیتے ہوئے فرار ہو گیا۔دوسری جانب ایف آئی آر کے اندراج کے بعد نامزد ملزم دانش لہڑی کی گرفتاری کے لیے چھاپے مارے جا رہے ہیں۔ اس سلسلے میں لہڑی ہاس پر مارے جانے والے چھاپے میں ملزم کی عدم دستیابی پر پولیس نے سدا بہار ٹرمینل پر چھاپہ مارا اور کار سرکار میں مداخلت پر سدا بہار ٹرمینل کی بسیں سریاب روڈ پر کھڑی کر دی گئیں، جس کے نتیجے میں سریاب روڈ بلاک ہو جانے پر شہریوں کو مشکلات کا سامنا ہے۔واضح رہے کہ واقعہ دو روز قبل سریاب تھانے کی حدود میں پیش آیا تھا ، جس میں ارباب کرم خان روڈ پر ٹریفک پولیس اہلکار نے دانش لہڑی جو سرکاری نمبر پلیٹ والی گاڑی میں سوار تھا اسے رکنے کا اشارہ کیا جس پر دانش لہڑی طیش میں آگیا اور ٹریفک پولیس اہلکار پر برس پڑا۔تھوڑی سے تلخ کلامی کے بعد دانش نے ٹریفک پولیس اہلکار پر گھونسوں کی بارش کردی، تاہم وہاں موجود افراد نے دانش لہڑی کو روکا جس کے بعد ملزم وہاں سے روانہ ہوگیا۔واقعے کی ویڈی وائرل ہوئی تو محکمہ پولیس بھی حرکت میں آگئی اور رات گئے لہڑی ہاس پر چھاپہ مار کر ملزم کو گرفتار کر لیا، تاہم ملزم نے واقعے پر معذرت کرلی ہے اور دونوں فریقین میں صلح کے بعد ملزم کو رہا کردیا گیا ہے دانش لہڑی نے اپنا ویڈیو بیان بھی جاری کیا ہے، جس میں انہوں نے کہا کہ جو واقعہ پیش آیا وہ نہیں ہونا چاہیے تھا۔ پولیس اہلکار ہمارے بھائی ہیں جن کی عزت کرنا ہم سب پر فرض ہے، میں گزشتہ روز پیش آنے والے واقعے پر معذرت کرتا ہوں۔