ایرانی پاسداران انقلاب نے شارجہ جانیوالا آئل ٹینکر روک لیا

تہران(آئی این پی) ایرانی پاسداران انقلاب نے آئل ٹینکر کو سمندر میں روک لیا ہے۔ ایران کے انقلابی گارڈز نے ٹوگو کے پرچم والے اس آئل ٹینکر کو روک لیا ہے جو متحدہ عرب امارات کے زیر انتظام تھا اور اس پر 1500ٹن مارین گیس آئل لے جایا جا رہا تھا، یہ اطلاع برطانوی بحری سیکیورٹی کے ادارے ایمبری نے دی ہے۔ عرب میڈیا کے مطابق یہ آئل ٹینکر عراقی ساحل کی طرف سے مارین گیس آئل لے کر آ رہا تھا اور اسے شارجہ پہنچنا تھا۔ جبکہ ایرانی پاسداران انقلاب نے اسے ایرانی بندرگاہ بوشہر سے جنوب مغرب میں 61سمندری میل کے فاصلے پر روک لیا۔برطانوی ادارے کے بقول یہ واقعہ سیاسی بنیادوں پر نہیں کیا گیا نہ ہی اس کا جنگی سرگرمی سے تعلق تھا بلکہ اندازہ ہے کہ ایرانی پاسداران انقلاب کی طرف سے اس آئل ٹینکر کو انسداد سمگلنگ کی کوشش میں دھر لیا گیا ہے۔ایمبری کے مطابق اس طرح کی کارروائیوں میں ایک تسلسل ہے۔ ایرانی پاسدران انقلاب سمندر کے راستے سمگلنگ روکنے کے نام پر اس طرح کی کارروائیاں کرتے رہتے ہیں۔ کیونکہ ایران کا تیل خطے میں سستا ترین ہے۔