بیرونی قوتیں سوشل میڈیا پر نوجوانوں کو ریاست سے دور کر رہی ہیں، سرفراز بگٹی

کوئٹہ(این این آئی)وزیر اعلیٰ بلوچستان میر سرفراز بگٹی نے امن کے عالمی دن کے موقع پر اپنے ایک پیغام میں کہا ہے کہ امن سے انسانیت کی بقاء اور ترقی یافتہ معاشرے کی تشکیل ممکن ہے تاہم آج دنیا بھر میں امن سب سے بڑا چیلنج ہے پاکستان عالمی سازشوں کے نرغے میں ہے جس میں ہمیں اندرونی معاملات درست کرنے کی ضرورت ہے وزیر اعلٰی میر سرفراز بگٹی نے کہا کہ امن کو مخدوش کرنے میں سوشل میڈیا کے منفی کردار سے آنکھیں بند نہیں کی جاسکتیں اور نہ ہی بلوچستان کے حالات خراب کرنے میں بیرونی قوتوں کو نظر انداز نہیں کیا جاسکتا ہے باہر بیٹھے ہینڈلر سوشل میڈیا پرنو جوانوں کو ریاست سے دور کررہے ہیں نوجوانوں اور ریاست میں نفرت کے بیج بو کر دوریاں پیدا کی جا رہی ہیں ، وزیر اعلٰی بلوچستان میر سرفراز بگٹی نے کہا کہ ہمیں حالات کی نزاکت کا ادارک کرنا ہوگا ہم اپنے نوجوانوں کو آکسفورڈ سمیت علم و ترقی کے لئے دنیا بھر میں بھیج رہے ہیں تو دوسری جانب امن دشمن عناصر انہیں مایوسی کے اندھیروں میں دھکیل کر امن مخدوش کرنے پر مائل کررہے ہیں انہوں نے کہا کہ امن کا قیام اور ہر شہری کا تحفظ ریاست کی ذمہ داری ہے پائیدار قیام امن کیلئے تمام اقدامات کئے جارہے ہیں میر سرفراز بگٹی نے کہا کہ عالمی یوم امن پر پاکستان اور بلوچستان کو امن کا گہوارہ بنانے کا عزم کرتے ہیں،