دفاعی نمائش اور سیمینار آئیڈیاز 2024کا 12 واں ایڈیشن کل کراچی میں شروع ہوگا

کراچی (صباح نیوز)دفاعی نمائش اور سیمینار آئیڈیاز 2024کا 12 واں ایڈیشن منگل کو کراچی ایکسپو سینٹر میں شروع ہوگا۔نمائش میں وسیع پیمانے پر جدید اور روایتی دفاعی آلات، ہتھیاروں اور گاڑیوں کی نمائش کی جائے گی۔عالمی دفاعی ماہرین آئیڈیاز 2024نمائش میں گہری دلچسپی ظاہر کر رہے ہیں۔دفاعی پیداوار اور برآمدات خصوصی سرمایہ کاری سہولت کونسل کی ترجیحات میں شامل ہیں ۔محکمہ تعلیم سندھ نے دفاعی نمائش کے پیش نظر کراچی میں چار روز کے لیے شارع فیصل اور کارساز کے اطراف تعلیمی ادارے بند رکھنے کا اعلان کردیا۔ محکمہ تعلیم سندھ نے شارع فیصل اور حبیب ابراہیم روڈ پر واقع تعلیمی ادارے 19 تا 22 نومبر تک بند رکھنے کا اعلان کیا ہے۔محکمہ تعلیم سندھ کے مطابق تعلیمی ادارے بند رکھنے کا فیصلہ آئیڈیاز نمائش کے دوران ٹریفک کی روانی بحال رکھنے کے لیےکیا گیا ہے۔خیال رہے کہ گزشتہ 25 سال سے کامیابی سے جاری آئیڈیاز نمائش کا انعقاد 19 سے 22 نومبر تک کراچی میں ہوگا۔سال 2000 میں پہلی بار انٹرنیشنل ڈیفنس ایگزیبیشن اینڈ سیمینار (آئیڈیاز) کا آغاز کیا گیا اور تب سے اب تک اس کا انعقاد مستقل بنیادوں پر ہورہا ہے۔ملک کی سب سے بڑی دفاعی نمائش کی میزبانی کے لیے ایک بار پھر کراچی کا انتخاب کیا گیا ہے۔