اے این ایف کی کراچی ایئرپورٹ پر کارروائی ،منشیات برآمد ،غیرملکی خاتون سمگلرگرفتار
کراچی (صباح نیوز)اے این ایف نے جناح انٹرنیشنل ایئرپورٹ کراچی پر بیرون ملک سے بھاری مالیت کی کوکین پاکستان سمگل کرنے کی کوشش ناکام بناتے ہوئے غیر ملکی برازیلین خاتون اسمگلر کو گرفتار کرلیا۔اے این ایف حکام کے مطابق برازیل سے جناح انٹرنیشنل ایئرپورٹ کراچی پہنچنے والی نجی ایئرلائن کی پرواز کے مسافروں کی کلیئرنس جاری تھی کہ مشکوک پائے جانے پر برازیلین خاتون مسافر کی تلاشی لی گئی تو پلاسٹک کے شاپر میں رکھ کر چھپائی گئی ایک کروڑ 39 لاکھ روپے سے زائد مالیت کی ایک کلو 396 گرام کوکین برآمد ہوئی۔حکام کا کہنا تھا کہ ملزمہ کے خلاف انسداد منشیات ایکٹ کے تحت مقدمہ درج کر کے مزید تحقیقات کا آغاز کر دیا گیا ۔منشیات سمگلنگ کے لیے جدید اور نت نئے طریقوں کا استعمال اے این ایف کے لیے کسی چیلنج سے کم نہیں، اس کے باوجود بھی اے این ایف منشیات اسمگلنگ کے خلاف پرعزم ہے۔
