کراچی کے نوجوان نے امریکی خاتون کو شادی کا جھانسا دیکر بلالیا، خاتون پاکستان پہنچ کر دربدر

کراچی (مانیٹر نگ ڈیسک)کراچی کے نوجوان نے امریکی خاتون کو اپنی محبت میں گرفتار کرکے پاکستان بلالیا، لیکن جب والدین نے اپنی عمر سے بڑی خاتون کو دیکھا تو شادی سے انکار کردیا۔ والدین کی ناراضی پر نوجوان خاتون کو چکمہ دے کر غائب ہوگیا، جس سے خاتون سکتے کی حالت میں آگئی اور کراچی ائیرپورٹ پر پھنس کر رہ گئیں۔کراچی کے علاقے گارڈن ویسٹ سے تعلق رکھنے والے 19 سال کے لڑکے نے امریکی خاتون کو اپنی محبت کے جال میں پھنسایا اور پاکستان بلالیا.تینتیس سالہ امریکی خاتون کا نام اونیا اینڈریو رابنسن ہے اور ان کا تعلق امریکا کی ریاست نیویارک سے ہے۔خاتون کراچی سے تعلق رکھنے والے نوجوان کی محبت میں گرفتار ہوکر پاکستانی آئی تھیں۔خاتون جب کراچی پہنچیں تو لڑکے کے والدین یہ جان کر حیران رہ گئے کہ ان کے بیٹے نے جسے پسند کیا ہے وہ ان کے بیٹے سے عمر میں تقریباً دو گنا بڑی ہے، شوہر سے طلاق لے کر آئی ہے اور دو بچوں کی ماں بھی ہے۔پولیس کے مطابق سات روز سے خاتون کراچی ائیرپورٹ پر بے آسرا موجود تھیں اور ویزہ ایکسپائر ہوجانے کی وجہ سے کراچی میں پھنس گئی تھیں۔حکام کے مطابق خاتون کو سیکیورٹی اداروں کی مدد سے پندرہ دن کا ویزہ فراہم کرکے دوبارہ امریکا بھیجنے کی تیاری مکمل کرلی گئی ہے۔ امریکی خاتون کو ٹکٹ فراہم کرنے کے بعد امریکا روانہ کردیا جائے گا۔حکام کا کہنا ہے خاتون کی جانب سے لڑکے کے خلاف کارروائی کیلئے کوئی درخواست نہیں دی گئی۔