پاکستان میں تعینات ایرانی سفیر کو ایف بی آر نے انتہائی مطلوب افراد کی فہرست میں شامل کرلیا

کراچی (مانیٹرنگ ڈیسک) امریکی تحقیقاتی ادارے ایف بی آئی نے اسلام آباد میں تعینات ایرانی سفیر رضا امیری مقدم کو 2007 میں امریکی ایف بی آئی ایجنٹ رابرٹ لیونسن کے اغوا میں مبینہ کردار پر اپنی مطلوب ترین افراد کی فہرست میں شامل کردیا ہے۔ تاہم، عرب خبر رساں ادارے ”عرب نیوز“ کا کہنا ہے کہ پاکستان نے واضح کردیا ہے کہ اسلام آباد میں تعینات ایرانی سفیر رضا امیری مقدم کو سفارتی استثنیٰ حاصل ہے۔ عرب نیوز کے مطابق، پاکستان کی وزارت خارجہ کے ترجمان شفقت علی خان نے کہا ہے کہ ’پاکستان کے لیے ایرانی سفیر قابل احترام شخصیت ہیں جنہوں نے پاکستان اور ایران کے تعلقات کے فروغ میں مثبت کردار ادا کیا ہے۔ انہیں ایک ہمسایہ اور دوست ملک کے سفیر کی حیثیت سے تمام تر سفارتی استحقاق اور احترام حاصل ہے۔‘ واضح رہے کہ ایف بی آئی نے ایک روز قبل اپنے جاری کردہ اعلامیے میں ”معلومات درکار ہے“ کے عنوان سے تین اعلیٰ ایرانی حکام کے نام شائع کیے، جن میں رضا امیری مقدم کے ساتھ ساتھ ایرانی وزارت انٹیلی جنس و سیکورٹی (ایم او آئی ایس) کے افسر تقی دانشور اور غلام حسین محمدنیا شامل ہیں۔ غلام حسین محمدنیا ایران کے سابق سفیر رہ چکے ہیں جنہیں 2018 میں البانیہ سے نکال دیا گیا تھا۔