بلوچستان میں ای فائلنگ سسٹم متعارف، شہری موبائل یا لیپ ٹاپ پر اپنے حلقے کے منصوبوں کی پیشرفت چیک کرسکیں گے، وزیراعلی

کوئٹہ (انتخاب نیوز) بلوچستان میں ملک کا پہلا خودکار ڈیجیٹل مالیاتی ای فائلنگ سسٹم متعارف، وزیر اعلیٰ سرفراز بگٹی نے افتتاح کردیا۔ افتتاحی تقریب سے خطاب کرتے ہوئے وزیر اعلیٰ بلوچستان سرفراز بگٹی نے کہا کہ ای فائلنگ سسٹم شفافیت، اچھی حکمرانی اور جدید ٹیکنالوجی کی طرف سنگ میل ہے، نیا نظام عوام کو براہِ راست ترقیاتی منصوبوں کی مالی و فزیکل پیش رفت تک رسائی دے گا۔ نیا نظام بروقت اور درست فیصلے کرنے میں افسران کی مدد کرے گا۔ عام شہری موبائل یا لیپ ٹاپ پر اپنے حلقے کے منصوبوں کی پیش رفت چیک کرسکیں گے۔ ای فائلنگ سے پبلک سیکٹر میں ”انڈر ٹیبل“ طریقہ کار مکمل ختم ہو جائے گا۔ یہ نظام بلوچستان میں شفاف حکمرانی اور عوامی وسائل کے مو¿ثر استعمال کی ضمانت ہے۔ تمام سیکرٹریز اپنے محکموں میں ای فائلنگ نظام جلد نافذ کریں۔ کابینہ اجلاس بھی اب ڈیجیٹل ٹیبلیٹس پر ہوں گے، فیصلوں میں تاخیر کا خاتمہ ہوگا۔ اس موقع پر سیکرٹری خزانہ عمران زرکون نے بریفنگ دیتے ہوئے کہا کہ بلوچستان کا پہلا ای فائلنگ سسٹم مکمل طور پر مقامی آئی ٹی ماہرین کی کاوش ہے۔ ای فائلنگ کے ذریعے محکمے اپنی بجٹ درخواستیں آن لائن جمع کرائیں گے۔ ہر مرحلے کی منظوری اور مالیاتی شفافیت واضح دستاویزی شکل میں دستیاب ہوگی۔ وزیر اعلیٰ کی جانب سے صوبائی وزیر خزانہ میر شعیب نوشیروانی، سیکرٹری خزانہ عمران زرکون اور ان کی ٹیم کو خراج تحسین پیش اور ای فائلنگ ٹیم کو تعریفی سرٹیفکیٹس و بونس کا اعلان کیا۔