مستونگ، دشت میں موٹر سائیکل چھیننے کی کوشش کرنے والا ڈاکو پولیس اہلکار کی فائرنگ سے ہلاک، دوسرا زخمی

مستونگ (صباح نیوز) مستونگ کے علاقے دشت میں پولیس اہلکار نے موٹر سائیکل چھیننے کی کوشش کرنےوالے ایک ڈاکو کو فائرنگ کرکے ہلاک دوسرے کو زخمی کردیا۔ پولیس کے مطابق منگل کی صبح ایگل اسکواڈ کا ایک اہلکار ڈیوٹی کے لیے دشت سے مستونگ شہر جارہا تھا۔ راستے میں دشت کمبیلا کے مقام پر دو مسلح ڈاکوﺅں نے اسلحہ کے زور پر ان سے موٹر سائیکل چھیننے کی کوشش کی۔ اہلکار نے حاضر دماغی اور بہادری کا مظاہرہ کرتے ہوئے پستول سے جوابی فائرنگ کی جس کے نتیجے میں ایک ڈاکو محمد یوسف ولد محمد علی شاہوانی موقع پر ہلاک جبکہ دوسرا ساتھی محمد حسن ولد محمد عظیم بنگلزئی زخمی ہوگیا۔ دونوں ملزمان کا تعلق کوئٹہ کے علاقے سریاب کسٹم سے بتایا جاتا ہے۔ لاش اور زخمی ڈاکو کو ڈسٹرکٹ ہیڈ کوارٹر ہسپتال مستونگ منتقل کردیا گیا۔ مزید کارروائی متعلقہ پولیس کررہی ہے۔