پشاور سی ٹی ڈی تھانے میں دھماکے سے سپاہی شہید، ہنگو میں سیکورٹی قافلے پر آئی ای ڈی حملے میں 3 اہلکار زخمی، پولیس

پشاور (ویب ڈیسک) پشاور سی ٹی ڈی تھانے میں دھماکے سے اہلکار شہید جبکہ 2 زخمی ہوگئے۔ نجی ٹی وی کے مطابق پشاور میں یونی ورسٹی روڈ پر واقع سی ٹی ڈی تھانے کے اسلحہ خانے میں دھماکا ہوا جس کے نتیجے میں ایک اہلکار شہید جبکہ 2 زخمی ہوگئے۔ سی سی پی او کے مطابق دھماکا اسلحہ خانے میں رکھے پرانے دھماکا خیز مواد کے پھٹنے سے ہوا، آگ دیگر گولا بارود تک بھی پھیل گئی جس سے مزید دھماکے ہوئے جبکہ بلڈنگ کا ایک حصہ گرگیا۔ پولیس کے مطابق تھانے میں موجود ملزمان کو سی ٹی ڈی ہیڈکوارٹرز منتقل کردیا گیا ہے جبکہ تھانہ سی ٹی ڈی اور اطراف کے علاقوں کو سیل کر دیا گیا ہے۔ پولیس حکا کا بتانا ہےکہ علاقے میں کلیئرنس کا عمل جاری ہے، بی ڈی یو، ریسکیو اور فائر بریگیڈ کی ٹیمیں امدادی کام کر رہی ہیں جبکہ ابتدائی طور پر یہ واقعہ دہشت گردی کی کارروائی نہیں لگتا۔ علاوہ ازیں ہنگو کے علاقے دو آبہ میں ایس پی، ڈی ایس پی اور ایس ایچ او کے قافلے پر آئی ای ڈی حملے میں 3 اہلکار زخمی ہو گئے۔ پولیس کے مطابق دوآبہ میں ایس پی انوسٹی گیشن عبدالصمد، ڈی ایس پی ٹل مجاہد اور ایس ایچ او عمران الدین کے قافلے پر آئی ای ڈی سے حملہ کیا گیا۔ حملے میں ایس ایچ او تھانہ دوآبہ عمران الدین، سب انسپکٹر جہاد علی زخمی اور ڈسٹرکٹ اسپیشل برانچ کا اہلکار عابد زخمی ہوئے۔