رشوت دے کر بیٹیوں کو کالج میں داخلہ دلانے پر جیل جانے والی اداکارہ آزاد

واشنگٹن :امریکی پولیس نے ہولی وڈ اداکارہ 56 سالہ لوری لافلن کو رشوت کے عوض بیٹیوں کو کالج میں داخلہ دلانے کے کیس میں 2 ماہ کی سزا مکمل ہونے پر رہا کردیا۔

لوری لافلن نے رواں برس اکتوبر میں خود کو پولیس کے حوالے کیا تھا، ان پر اور ان کے شوہر فیشن ڈیزائنر موسمو گیانولی پر الزام تھا کہ انہوں نے دو جوان بیٹیوں کو یونیورسٹی آف سدرن کیلی فورنیا کے کالج میں داخلہ دلوانے کے لیے 5 لاکھ امریکی ڈالر کی رشوت دی تھی۔

دونوں نے عدالت میں کیس چلنے کے بعد ابتدائی طور پر الزامات کو مسترد کیا تھا تاہم بعد ازاں دونوں نے جرائم کا اعتراف کیا تھا۔ جس کے بعد لوری لافلن اور ان کے شوہر فیشن ڈیزائنر موسمو گیانولی کو رواں برس اگست میں امریکی ریاست میساچوٹس کے شہر بوسٹن کی ضلعی عدالت نے مجرم قرار دیتے ہوئے جیل اور جرمانے کی سزا سنائی تھی۔

عدالت کی جانب سے سزا سنائے جانے کے بعد لوری لافلن نے اکتوبر میں خود کو پولیس کے حوالے کیا تھا اور اب دو ماہ کی قید مکمل ہونے پر انہیں رہا کردیا گیا۔